Berisha: Dhurata e pazakontë e Ramës për Lali vjedhësin, i firmosi lejen e azilit politik

Kryetari i opozitës, Sali Berisha, publikoi një video-mesazh  në rrjetin social X, si reagim pas deklaratave të kryeministrit Edi Rama për kryebashkiakun Erion Veliaj.

Berisha  u shpreh se Rama i ka bërë dhuratë Veliajt dhuratën më të pazakontë për vitin e ri duke i firmosur lejen e azilit politik.

“Përshëndetje të dashur miq.

Edi Rama i bëri dje Erion Veliajt dhuratën më të pazakontë për vitin e ri 2025.

Ai de facto, me deklaratën e tij se Erion Veliajn po e linçojnë në vendin ku ai është kryeministër, i firmosi lejen e azilit politik pothuajse në cilindo vend që ai ta kërkojë, pasi linçimi është një akt i dënueshëm dhe që meriton mbrojtje kudo që kërkohet.

Pardje, Edi Rama deklaroi se Erion Veliaj po hetohet si gjithë të tjerët dhe çdo njeri mund të hetohet dhe çdo i hetueshëm nuk është i fajshëm.

Dje ndërroi 180 gradë, thuhet se Rama mori një ultimatum nga Erion Veliaj, në të cilat i thotë se ato që bëre ndaj meje, do i kesh të gjitha në kurriz dhe jo vetëm, por së bashku me Lindën dhe familjen.

Ky kërcënim detyroi Ramën të bëjë një kthesë prej 180 gradësh dhe të firmosë lejen e azilit politik për njeriun me të cilin ka vjedhur së bashku qindra e qindra milionë,” shprehet Berisha.

Kryeministri Edi Rama komentoi dje hetimet e Prokurorisë së Posaçme ndaj kryetarit të Bashkisë Tiranë, Erion Veliaj.

Kreu i qeverisë u shpreh se kryebashkiakut Veliaj po i cenohet jeta e tij familjare nga gjyqi publik që po i bëhet.

Kryeministri shtoi se linçimi publik i kryetarit të bashkisë është i neveritshëm dhe se kërkimi i gijotinës për të është skandaloz.

“Përkohësisht di që Erion Veluajt i cenohet jeta e tij familjare nga gjyqi publik i bërë jo nga institucioni përkatës, por nga të gjithë ata që janë angazhuar në atë gjyq.

I cenohet dinjiteti nga prokurorë dhe gjykatës të ulët nëpër klube mediatike, apo të fshehur pas ekraneve të portaleve. Këtë e di me siguri. Ndërsa sa i përket pjesës tjetër nuk bën përjashtim askush nga ajo që kam thënë në fillim, nuk bëj komente për çështje që i takojnë institucioneve të drejtësisë.

Deri sot është qëndrimi im, mund të komentoj vendime të formës së prerë për një shpifës, që për mua ka qenë një nga vendimet më të drejta. Linçimi publik i kryetarit të bashkisë është i neveritshëm, kërkimi i gijotinës për të është skandaloz. Këto janë komentet”, tha Rama.