Deputeti i PS-së, Pandeli Majko ka reaguar sërish pas akuzave të Sali Berishës se ligjvënësi socialist ka dalë në përgjimet e SHISH duke bërë pazare për blerje votash në tre qarqe, përfshirë Kukësin, ku ka qenë drejtues politik i Partisë Socialiste.
Majko ka zhvilluar një takim sot me kryetaren e Kuvendit, Elisa Spiropali, ku i ka kërkuar që të dorëzojë imunitetin parlamëntar, lidhur me aludimet për fshehje informacioni të deklaruar dje në publik nga Sali Berisha.
“Sot, në takim me kryetaren e Kuvendit të Shqipërisë, Elisa Spiropali!…
I kërkova që brenda protokolleve në fuqi, ti kërkohej Shërbimit Informativ Kombëtar informacion me shkrim, lidhur me aludimet për fshehje informacioni të deklaruar dje në publik nga Sali Berisha!
Kam vendosur që të dorëzoj çdo imunitet parlamentar i cili mund të jenë i nevojshëm për hetimin e çështjes së ngritur për emrin tim në deklarimet publike të Sali Berishës!”, shprehet Majko.
Kryetari i Partisë Demokratike, Sali Berisha e ka cilësuar dje Pandeli Majkon një kriminel elektoral, duke shtuar se ketë e bazon në përgjimet e SHISH.
“Majko është kriminel i madh elektoral në Kukës, është i regjistruar në tavolinë me regjistrues të vendosur me vendim gjykate nga SHISH, jo për Majkon por për trafikantë droge dhe armësh. Aty shkon dhe bie zoti Pandeli. Dosja është te ata, por edhe te unë. Aty shkon Pandeliu me Alban Çelën dhe drejtorin e OSHEE të Kukësit dhe i thotë drejtorit ‘ti në Has do kërkosh shtylla centrifugale dhe do ti marrësh në një kompani buzë Erzenit’. Ato kushtonin 40-60 mijë euro, por thotë, do faturohen 800 mijë euro, nga të cilat 300 mijë do t’i dërgohen Tropojës për të blerë vota, 200 mijë do të dërgohen në Durrës, të tjerat në Kukës. Oficeri i cili ishte në detyrë për të hedhur në qark trafikantët, habitet. Përveç kësaj në bisedë aty përfaqësuesit e Hasit kërkojnë armë sepse Miftar Dautin, kandidatin tonë, thonë se nuk e mundin dot. Ky oficer i përgjegjshëm, e merr regjistrimin, përgatit dosjen dhe e dorëzon në SKAP”, deklaroi Berisha.
Discussion about this post