Nga 1 janari duhanpirësit po paguajnë më tepër për shkak të rritjes së akcizës për këtë produkt, një politikë kjo e ndërmarrë nga qeveria që qëllim kryesor ka uljen e konsumit.
Në pikat e shitjes me pakicë për çdo paketë çmimi është shtuar me minimalisht 10 lekë.
Deri më 31 dhjetor 2024, detyrimi i akcizës për cigaret apo purot që përmbajnë duhan ishte 7250 lekë / 1000 fije cigare. Nga 1 janari i këtij viti, detyrimi i akcizës për cigaret apo purot që përmbajnë duhan është 7500 lekë / 1000 fije cigare.
Ndryshimet e miratuara nga qeveria në ligjin “Për akcizat” në vitin 2021 vendosën një skedul të ri për rritjen e nivelit të akcizës së duhanit dhe nënprodukteve të tij për periudhën 2022-2026, me qëllim përafrimin me nivelin e akcizës që aplikohet në BE, duke synuar dhe një unifikim të nivelit të akcizës ndërmjet duhanit dhe nënprodukteve të tij.
Ndërsa në Strategjinë Afatmesme të të Ardhurave 2024-2027 është parashikuar hartimi i një kalendari të ri për rritjen e nivelit të akcizës së duhanit dhe nën produkteve të tij për periudhën 2027 e në vijim.
Të ardhurat nga akciza programohen 66,984 milionë lekë, ose 2.6 miliardë lekë më shumë se në 2024-ën. Faktorët kryesorë në parashikimin e të ardhurave nga akciza lidhen me rritjen e të ardhurave nga akciza që gjeneron rritja ekonomike shtesë; rritjen e sasive të importit dhe konsumi i mallrave si karburante, cigare, pije alkoolike, verë, birrë etj, si dhe rritja e nivelit të akcizave për shkak të zbatimit të kalendarit të rritjes së niveleve të akcizës për duhanet.
Për vitin 2025 janë parashikuar të ardhura shtesë nga zbatimi i kalendarit të rritjes së akcizës në shumën prej 852 milionë lekë, si dhe 20% TVSH mbi këtë shumë të rritur akcize.
Discussion about this post