Rusia dhe Shtetet e Bashkuara të Amerikës kanë rënë dakord të bisedojnë në 10 janar në Gjenevë për sigurinë në Europën Lindore. Një vendim që nuk i ka pëlqyer aspak përfaqësuesit të lartë për politika të jashtme dhe siguri në BE, Joseph Borell.
Borell u shpreh se nëse Moska dëshiron të flasë për arkitekturën e sigurisë në Europë atëherë kjo nuk është një çështje që i përket vetëm Amerikës dhe Rusisë. Borell theksoi se BE duhet të jetë e pranishme në këto negociata, se vetëm në këtë mënyrë do të kishin kuptim. Sekretari amerikan i mbrojtjes, Loyd Austin ndërkohë urdhëroi anijet amerikane të luftës të qëndrojnë në Mesdhe në një kohë që tensionet mes Ukrainës dhe Rusisë përshkallëzohen.
Ndërkohë sekretari amerikan i shtetit Anthony Blinken, gjatë një bisede telefonike me presidentin ukrainaz Zelenski, shprehu dhe njëherë mbështetjen e SHBA-së ndaj Kievit, duke iu referuar përqendrimit të forcave ushtarake ruse në kufi. Departamenti amerikan i shtetit konfirmoi se Blinken dhe Zelenski folën për përpjekjet në zgjidhjen në mënyrë paqësore të konfliktit në Ukrainën lindore dhe për një dialog në të ardhmen me Rusinë.
Discussion about this post