Mbrëmjen e shkuar 56-vjeçari Bujar Nasufi u qëllua për vdekje me breshëri plumbash në “Myrte Zeneli” pranë zonës së njohur të kryeqytetit si “Pallati me Shigjeta”
Ajo çfarë dihet deri më tani është fakti se 56-vjeçari është qëlluar me 6 plumba nga një person i maskuar që qarkullonte me një motor ngjyrë të zi. Menjëherë pas ngjarje ky shtetas, identiteti i të cilit deri më tani nuk dihet, është larguar me shpejtësi drejt zonës së “Selitës” ku dhe ka humbur gjurmët.
Burime për mediat bëjnë me dije se Bujar Nasufi prej vitesh jetonte në Tiranë, por origjinën e ka nga qyteti i Beratit.
Sipas Policisë viktima nuk rezulton të ketë qenë një shtetas problematik apo me precedent penal. Ai së bashku me vëllain ishin pronarë të një mobilerie në zonën e “Pallatit me Shigjeta” ku dhe iu bë atentati.
Dyshohet se në momentin që është qëlluara 56-vjeçari sapo ka dalë nga biznesi i tij dhe po shkonte drejt banesës, të cilën po ashtu e kishte në atë zonë.
Kanë qenë dëshmitarët ata të cilët kanë parë mjetin e viktimës të ndaluar në mes të rrugës dhe menjëherë kanë telefonuar dhe Policinë.
Në kuadër të hetimeve, policia ka marrë në pyetje familjarët e viktimës, për të zbuluar shkaqet e mundshme të këtij ekzekutimi.
Një grup i posaçëm hetimor, nën drejtimin e Prokurorisë, ndodhet në vendngjarje dhe vazhdon punën për sqarimin e rrethanave të ngjarjes, identifikimin dhe kapjen e autorit/ëve të dyshuar. Deri më tani theksojmë se nuk është e qartë a ka qenë një autor i cili ka vepruar i vetëm, apo ka pasur persona të tjerë të cilët e kanë ndihmuar.
Lidhur me këtë ngjarje priten më tepër informacione në vijim, ndërkohë Policia e Shtetit është duke vijuar kontrolle të imtësishme në të gjitha nyjat kyçe të kryeqytetit.
Discussion about this post