Një shpërthim i fuqishëm në një biznes, ndodhur pak pas mesnatës së të shtunës, ka bërë që të kthehet në Shkodër paniku dhe frika e ngjarjeve të rënda kriminale. Për fatin e shënjestrës, në biznesin e hedhur në erë në atë orë nuk ka pasur asnjë person brenda, por biznesi i shkatërruar është një hotel që shërben edhe si market për zonën, çka do të thotë se është një biznes i shfrytëzuar për turizmin malor në një prej zonave më të frekuentuara në Shqipëri, Theth.
Autori ka marrë rrugën nga shtëpia e tij për në ndërtesën që i shërbente si biznes dy vëllezërve në Theth, ka hedhur lëndën plasëse dhe më pas është larguar, por ka harruar se i gjithë objekti ka qenë i pajisur me kamera sigurie, kamera që kanë mundur të fiksojnë edhe pamjen e autorit.
Policia që është vënë në ndjekje pas marrjes së informacionit të parë ka mundur ta sjellë në pranga, ndërkohë që ai ka pranuar se ka marrë porosi, e madje nga burgu, për të sulmuar me tritol biznesin në Theth. Pamjet e siguruara nga policia tregojnë momentin kur autori me çadër afrohet tek hoteli dhe pasi vë tritolin largohet.
Nga shpërthimi janë shkaktuar dëme të shumta materiale në hotelin që është në pronësi të shtetasit Çesk dhe Ardjan Breishta. Brenda pak orësh policia arriti të identifikojë dhe të arrestojë autorin e dyshuar, i cili mësohet se është Frederik Paplekaj. “Në përfundim të veprimeve u bë arrestimi në flagrancë i 39- vjeçarit për veprat penale “Shkatërrimi i pronës me eksploziv” dhe “Prishja e qetësisë publike” informoi sot policia e Shkodrës.
Gjatë marrjes në pyetje 39-vjecari ka deklaruar se porosinë për vendosjen e tritolit e kishte marrë nga burgu por nuk ka pranuar të japë detaje të tjera.
Prej muajsh Shkodra me rrethina kanë pasur ngjarje të rënda kriminale, ndërsa ngjarja e ndodhur mëngjesin e djeshëm, ndonëse duket se ka motiv konkurrencën, ka bërë që grupi hetimor të kërkojë të dhëna nga disa organe ligjzbatuese. Pritet rrëfimi i autorit për të mësuar se cilët janë porositësit, pasi autori dhe të zotët e biznesit nuk rezultojnë të kenë probleme me njëri-tjetrin!
Discussion about this post