Jonaid Myzyri është drejt largimit nga posti si drejtues i KPP-së. Kryeministria ka hapur garën për zgjedhjen e kryetarit të ri të Komisionit të Prokurorimit Publik.
Shpallja e vakancës u bë e ditur përmes një njoftimi të publikuar në Buletinin e Prokurimeve në faqen e Kryeministrisë vetëm 3 ditë më parë.
Në njoftimin e publikuar, aplikanti duhet të përmbushë disa kritere për të marrë detyrën e kreut të KPP.
Aplikanti duhet të plotësojë këto kritere:
a) Të jetë shtetas shqiptar;
b) Të ketë zotësi të plotë për të vepruar;
c) Të ketë arsim të lartë në drejtësi;
ç) Të ketë mbi 8 (tetë) vjet përvojë pune, nga të cilat, të paktën, 3 (tre) vjet në fushën e prokurimeve dhe, të paktën, 2 (dy) vjet në pozicion drejtues;
d) Të mos jetë i/e dënuar me vendim gjyqësor të formës së prerë për kryerjen e një vepre penale;
dh) Të mos jetë larguar nga puna ose nga shërbimi civil me masë disiplinore ose të mos ketë ndonjë masë disiplinore në fuqi;
e) Të mos jetë nën procedim penal për kryerjen e një vepre penale.
Qeveria ka bërë me dije se afati për aplikantët e interesuar është deri më 27 janar.
Komisioni i Prokurorimit Publik është drejtuar nga Jonaid Myzyri prej vitit 2020, i cili u mor në pyetje vetëm pak kohë më parë nga Prokuoria e Posaçme kundër Korrupsionit dhe Krimit të Organizuar për çështjen e ‘Sterilizimit’. ‘Intervista’ e Muzyrit në SPAK erdhi dy muaj pasi nisën hetimet ndaj Komisionit të Prokurimit Publik, institucion që zgjedh ofertën më të leverdisshme ekonomike për paratë shtetërore për shumicën e punëve publike si në Infrastrukturë, Energjitikë, Shërbime, Restaurime, Teknologji Informacioni apo Investime Publike.
Discussion about this post