Një plagosje ka ndodhur këtë të martë në Shkodër, ku në vazhdën e një konflikti, një 30-vjeçar është goditur me thikë.
I lënduari është Ademir Fresku, këngëtar, i cili raportohet se ndodhet jashtë rrezikut për jetën. Ndërsa autori i dyshuar është identifikuar si 50-vjeçari Gjergji Dardha. Ky i fundit është arrestuar pas krimit.
Plagosja u shënua rreth orës 11:00, te sheshi “Demokracia”, pranë teatrit “Migjeni”, jashtë një lokali që Ademir Fresku e kishte marrë me qera.
“Dyshohet se shtetasi Gj. B., 50 vjeç, ka dëmtuar me mjet prerës (thikë), shtetasin A. F., 30 vjeç, i cili është jashtë rrezikut për jetën. Shërbimet e Policisë po vijojnë kontrollet për kapjen e shtetasit Gj.B. Grupi hetimor, në drejtimin e Prokurorisë, po punon për zbardhjen e rrethanave të rastit”, deklaroi policia në njoftimin paraprak për ngjarjen.
Më vonë, policia njoftoi arrestimin e autorit të dyshuar: “Shërbimet e Policisë kanë bërë të mundur identifikimin, kapjen dhe shoqërimin në Komisariatin e Policisë Shkodër, të shtetasit Gj. D., 50 vjeç. I dëmtuari, shtetasi A. F., po merr mjekim dhe është jashtë rrezikut për jetën. Grupi hetimor, në drejtimin e Prokurorisë, vijon punën për zbardhjen e rrethanave të rastit”.
Burime policore thanë se plagosja ndodhi pas një konflikti që palët kishin në lokalin që këngëtari kishte marrë me qera. Aty kishte shkuar 50-vjeçari, i cili ka një dyqan fruta-perimesh pranë lokalit dhe mes palëve ka nisur një konflikt.
Sipas motrës së autorit të dyshuar, konflikti fillimisht ka nisur për hedhjen e mbeturinave të 50-vjeçarit pranë lokalit, ndërkohë që ditën e sotme, kur tregtari ka shkuar në lokalin e 30-vjeçarit Fresku, i është thënë se nuk do t’i shërbehet më, duke e paralajmëruar që të mos shkojë tek lokali i tij.
Këtu ka nisur konflikti mes autorit dhe të plagosurit, që ka sjellë edhe përdorimin e armës së ftohtë.
Lexo edhe:
Plagosi këngëtarin, flet motra e autorit: U zunë për mbeturinat
Discussion about this post