Në kërkim nga Italia për drogë, arrestohet në Berat – Emri

Një person i shpallur në kërkim nga autoritetet italiane është arrestuar nga policia në Berat.

Në pranga u vu Fatmir Isollari alias Fatmir Cenka, i cili rezulton banues në Berat. Sipas policisë, ai është dënuar nga autoritetet italiane, me 7 vjet burgim, për pjesëmarrje në organizatë kriminale për trafikim të lëndëve narkotike. Gjatë periudhës 2002-2003, kjo organizatë akuzohet se trafikoi 20 kg kokainë nga Shqipëria në Firence.

Aksioni për arrestimin e 58-vjeçarit i koduar “Operacionalja 23”, tha policia, erdhi pas koordinimit të informacioneve me homologët e Policisë italiane.

“Ky shtetas ishte shpallur në kërkim ndërkombëtar nga Drejtoria e Interpolit, pasi Gjykata e Apelit e Firences, Itali, në vitin 2023, e ka dënuar me 7 vjet burgim, për pjesëmarrje në organizatë kriminale për trafikim të lëndëve narkotike. Interpol Tirana po bashkëpunon me Interpol Romën, për të finalizuar procedurat për ekstradimin e këtij shtetasi, në Itali”, njoftoi policia.