Fenomeni i hakmarrjes dhe gjakmarrjes është një plagë e thellë në shoqërinë shqiptare, një traditë e lashtë që vazhdon të ndikojë tragjikisht në jetët e shumë familjeve, veçanërisht në zonat rurale. Këto praktika, të rrënjosura në Kanunin e Lekë Dukagjinit, janë kthyer në një barrë të rëndë sociale dhe psikologjike, duke lënë pasoja të rënda në individë dhe komunitete.
Gjin Marku, një pajtues gjaqesh me përvojë të gjatë, ka ndërmarrë një mision jetësor për të ndaluar këtë cikël vdekjeprurës. Në një intervistë të veçantë për Fax News me gazetaren Vanesa Rrahmani, Gjin Marku, ndan mendimet dhe përvojat e tij në ndërmjetësimin midis palëve në konflikt, duke theksuar rëndësinë e dialogut, mirëkuptimit dhe pajtimit si mënyra për të shuar armiqësitë dhe për të ndërtuar një të ardhme paqësore.
“Aktualisht ka një moment qe po shfaqet me intensitet në aspektin e vrasjeve për hakmarrje/gjakmarrje, veçanërisht këtë fillim viti e cila ka nisur me ngjarje tragjike, pavarësisht se viti që shkoi, u shfaq përsëri i njëjti kapacitet vrasjesh për gjithë përiudhën 12 mujore, 50 % më pak seç kemi patur vrasje në vit. Kanë luajtur rol shumë të madh procesi i pajtimit dhe mundësia për t’u larguar jashtë Shqipërisë të familjeve që kërkojnë azil për shkak të rrezikut në vendin e origjinës”, shprehet Gjina Marku për mikrofonin e Fax News.
I pyetur nësë pajtimi është një proces i përhershëm apo ka nevojë për mbikqyrje të vazhdueshme, Zoti Marku u shpreh se pajtimi në vendin tonë është një detyrim zakonor. Marku përshkruan se si hakmarrja shpesh lind nga ndjenja e padrejtësisë dhe dëshira për të ruajtur nderin, por përfundon duke shkatërruar jetë dhe duke përjetësuar dhimbjen në breza. Ai bën thirrje për ndërgjegjësim shoqëror dhe përpjekje të përbashkëta për të zëvendësuar këto tradita të dhunshme me vlera të paqes dhe solidaritetit.
Discussion about this post