Një bandë ‘skifterësh’ shqiptarë që bënin ‘batërdinë’ me vjedhje në seri është goditur dy ditë më parë në Spanjë nga Roja Civile.
Gjashtë shqiptarë janë arrestuar si përgjegjës për valën e grabitjeve në Coruña dhe Pontevedra. Ekipi kundër Krimit të Organizuar në Galicia drejtoi aksionin.
Autorët përdorën makina me targa false për të operuar për një ditë të vetme në çdo krahinë, kryesisht zona e veriut të vendit dhe në Madrid. Dy nga drejtuesit e grupit u arrestuan në Paris.
Policia publikoi edhe pamje të kapura nga kamerat e sigurisë së banesave, ku të dyshuarit shfaqen si ‘ninxha’ duke kapërcyer muret.
Aksioni u krye në të njëjtën kohë që mbahej edhe operacioni antidrogë për goditjen e një karteli shqiptarësh me 1,1 tonë kokainë në Vilanovë.
Ankesat e shumta të qytetarëve çuan hetuesit në një kontroll intensiv të territorit. Shumë prej plaçkitjeve janë kryer edhe në Paris, pasi grupi cilësohej si një ‘bandë shëtitësish’.
Hetimet kishin nisur prej vitit 2023, kur nisën bastisjet e para me të njëjtën skemë. Autorët përdornin dy makina të vjedhura në Itali. Ata cilësohen përgjegjës për 16 grabitje të kryera në brenda një muaji. Në një ditë të vetme ata synonin një krahinë të caktuar, në mënyrë që të shmangnin vendndodhjen.
Hetuesit e cilësuan një ‘bandë modus operandi’, me skemë dhe taktikë të paracaktuar. Një nga taktikat ishte edhe çaktivizimi i alarmeve të sigurisë së vilave, thyerja e dyerve dhe dritareve kur nuk arrinin dot mënyrë tjetër apo përdorimi i dokumenteve false për të qarkulluar.
“Brenda celulës kriminale kishte shoferë, roje sigurie dhe specialistë për hyrjen në shtëpi. Të gjithë ata përdorën sisteme të mbyllura komunikimi për të vepruar, gjë që jep një ide të specializimit të tyre. Kanë udhëtuar mijëra kilometra duke ardhur e duke shkuar për të vepruar”, shpjegon Roja Civile për mediat spanjolle.
Vetëm në Spanjë, duke marrë parasysh bizhuteritë dhe arin, vjedhja e të cilave u raportua nga pronarët e tyre, plaçka arriti në 300 mijë euro në periudhën e hetuar.
Në kohën kur celula u zbërthye, hetuesit mësuan se 2 krerët e bandës kishin lëvizur për në Paris, ku objektiv kishin mësymjen gjatë kohës së Lojërave Olimpike, në muajin Gusht.
Por aty nuk ia dolën dot, pasi u arrestuan.
Sa i përket katër të tjerëve, ata u arrestuan në Barcelonë, Tarragona dhe Toledo, një shenjë e lëvizshmërisë së tyre shumë të lartë gjeografike. Në udhëtimet e tyre të mëdha nëpër Gadishull ata kryen edhe grabitje të shumta në Castilla y León. Koordinimi i Europolit ishte thelbësor në këtë rast, pasi autoritetet spanjolle morën inteligjencë nga Franca dhe vetë Shqipëria.
Organizata kishte majën e piramidës që dyshohet se drejtohej nga Shqipëria, dy kapot që u kapën në Paris, ushtarët që vepronin në Spanjë dhe ndihmësit, si shoferët dhe rojet, që ishin fundi i saj, apo niveli i tretë që fshihte plaçkën e vjedhur apo e shiste.
Hetuesit dyshojnë se anëtarët e bandës kishin edhe “trajnim ushtarak” nga mënyra se si vepronin, gati si skenat e filmave aksion.
Pasi kishin marrë plaçkën, duhej të zbritnin shpenzimet që rrjedhin nga veprimtaria kriminale (dhënien me qira të shtëpive të sigurta, karburant apo mjete për kryerjen e vjedhjeve). Pjesa tjetër u transportua drejtpërdrejt në Shqipëri, të gjitha të kryera nga palë të treta që udhëtonin duke përdorur linja tregtare ose transport privat.
Hetuesit besojnë se ‘koka e grupit’ mbetet ende në Shqipëri dhe banda nuk është çmontuar plotësisht, kurse hetimet mund të vijojnë në bashkëpunim edhe me Tiranën.
Discussion about this post