Po zhvillohet ditën e sotme në Gjykatën e Posaçme seanca për padinë e ish-drejtorit të Policisë së Shkodër, Edmond Sulaj ndaj Gazment Bardhi, ku e akuzon këtë të fundit për shpifje bazuar mbi një deklaratë të deputetit demokrat në seancën plenare të 12 shtatorit nga foltorja e Kuvendit mbi bisedat e aplikacionit të enkriptuar “Sky Ecc”.
Deputeti i PD-së për të disatën herë nuk paraqitet në seancë, por përfaqësohet nga avokatët e tij, Marash Logu dhe Ledio Braho, ndërsa ish-kryepolici i Shkodrës është prezent në gjyq.
Në nisje të seancës, Edmond Sulaj i ka bërë me dije gjykatës përmes avokatit të tij se nuk kërkon dëmshpërblim, por vetëm dënimin e Gazment Bardhit, pasi i ka dëmtuar imazhin për shkak të fyerjes së bërë prej tij.
“Deklaroj se tërhiqen nga kerkesa për dëmshpërblim për dëmin e shkaktuar, por kërkojnë vetëm dënimin e të akuzuarit Gazmend Bardhi për veprat penale të fyerjes dhe shpifjes së bërë botërisht”, ka deklaruar avokati.
Seanca e sotme pritet të vazhdojë me shqyrtimin e provave dhe dëgjimin e palëve të përfshira në këtë çështje.
Në seancën e kaluar të mbajtur më 13 janar, avokati Marash Logu deklaroi se Gazment Bardhi nuk e kishte përmendur personalisht Sulën, por i referohej Policisë në përgjithësi. Nga ana tjetër, mbrojtja e Sulës theksoi se materialet e përmendura nga Bardhi i përkisnin periudhës 2019-2020, tre vite para se Sula të emërohej në detyrën e tij aktuale.
Kujtojmë se kreu i grupit parlamentar të PD-së gjatë replikave me Edi Ramën lexoi një komunikim në SKY ECC, për të cilat deklaroi se janë provë se ish-Drejtori i Policisë së Shkodrës, Edmond Sulaj është emëruar nga bandat.
Bardhi lexoi bisedat e bandave kriminale, ku flisnin për vendosjen e “Mondit” për një dimër në krye të Policisë së Shkodrës, që sipas demokratit bëhet fjalë për drejtorin aktual në atë kohë Edmond Sulaj.
Gazment Bardhi: “Unë po të pyes (i drejtohet Ramës) si ta quajnë drejtorin e policisë së Shkodrës, e di emrin? Ta them unë kush ta ka emëruar. Kodi pin i Sky ECC, DGLXJM: O vëlla ka llafe për atë mikun tënd ministër të Brendshëm. Di gjë ti? Përgjigjet kodi sky 7142D9: Po por kam frikë se nuk e bën.
Ndërhyn prapë kodi DGLXJM: Mua Mondi (Edmond Sulaj, kryepolici aktual i Shkodrës) më duhet një dimër aty vëlla. Në fakt Mondi është drejtori aktual i policisë Shkodër që u emërua një muaj pasi ky miku i ministrit të Brendshëm është përfaqësues i një prej bandave më të rrezikshme në vend u bë ministër i Brendshëm. Dhe vjen ti këtu dhe akuzon opozitën, se të thotë që je i lidhur me krimin e organizuar? Patjetër që do japësh llogari”
Pavarësisht se Bardhi deklaroi se Edmond Sulaj u vendos në krye të Policisë së Shkodrës vetëm një muaj pas komunikimeve në “Sky Ecc” për “Mondin”, vetë ish-kryepolici i Shkodrës reagoi dhe tha se ishte vendosur në atë pozicion tre vjet pas atyre komunikimeve.
Discussion about this post