Gjykata e Posaçme ka rrëzuar kërkesën e ish-ministrit të Shëndetësisë, Ilir Beqaj, i cili kishte kërkuar përjashtimin e gjyqtares Flojera Davidhi nga çështja e aferës së sterilizmit, pasi kjo e fundit iu rëndoi akuzat të pandehurve me veprën penale vjedhje duke shpërdoruar detyrën në kuadër të grupit të strukturuar kriminal.
Beqaj pretendonte se gjyqtarja Davidhi nuk ka pranuar të japë një vendim të arsyetuar për rëndimin e akuzës ndaj tij, por megjithatë, kërkesa e Beqajt është rrëzuar.
Burime bëjnë me dije se Ilir Beqaj ka kërkuar gjykim të zakonshëm duke pretenduar se gjatë procesit do ta rrëzoje këtë akuzë.
Ish-ministri në seancës e sotme gjyqësore është shprehur se akuza ndaj tij është tendecioze, ndërsa ai nuk do të bie pre e presionit për të kërkuar gjykim të shkurtuar.
“Më janë shkelur të drejtat, akuzat e mia i ka bërë PD, keni dëmtuar në mënyrë të qëllimshme procesin, nuk ka një akuzë të shkruar për atë që akuzohem, ndikimi juaj është politik, vendimet tuaja i duartroket Sali Berisha, ju dhe prokuroria nuk keni dashur të zbuloni të vërtetën, unë nuk kam mundësi të mbrohem, por vetëm të denoncoj”, ka deklaruar ish-ministri.
Ndërkohë, Gjykata është tërhequr për të marrë një vendim mbi dy të pandehurit e tjerë, ish zëvendësministrin Klodian Rjepaj dhe biznesmenin Ilir Rrapaj, të cilët kanë bërë kërkesë për gjykim të shkurtuar.
Kujtojmë se akuza e shtuar nga gjyqtarja Davidhi është një akuzë më e rëndë nga ajo që kishte ngritur SPAK në përfundim të hetimeve paraprake dhe dërgimit të dosjes për gjykim. SPAK e akuzonte Beqajn vetëm për veprën penale “shpërdorim detyre”, ndërsa Rjepajt dhe Rrapajt dosja kishte akuzën e “mashtrimit me pasoja të rënda në bashkëpunim”. Gjyqtarja Flojera Davidhi do të vendosë dhe nëse do e dërgojë dosjen për gjykim ose jo.
Hetimet gati 3-vjeçare të kryera nga SPAK kanë zbuluar shkelje të ligjit në procedurat e dhënies së njërit prej koncesioneve më të kushtueshme të sektorit të shëndetësisë, me qëllimin e vetëm të shpalljes fitues të kompanisë së Ilir Rrapajt dhe shtetasit Italian, Umbro Staccini. Referuar hetimeve, vlera e koncesionit që llogaritet rreth 100 milionë euro, është fryrë fiktivisht dhe dhjetëra milionë euro. Para që deri më tani, prokuroria nuk e ka zbuluar se në xhepat e kujt kanë shkuar.
Në lidhje me këtë dosje, SPAK lëshoi urdhër-arreste vetëm Klodjan Rrjepajn dhe Ilir Rrapajn në Gushtin e vitit të kaluar, por Ilir Beqaj u arrestua më vonë. Ai u vu në pranga në fillim të muajit korrik në lidhje me abuzimin me fondet e Bashkimit Europian gjatë kohës që ish-ministri drejtonte Agjencinë Shtetërore të Programimit Strategjik dhe Koordinimit të Ndihmës (SASPAC).
Beqaj dyshohet se përmes njerëzve të besuar ka ndërtuar një skemë për të përfituar shuma të mëdha parash duke lëshuar fatura fiktive për shërbime të pakryera, të lëshuara nga biznese të ndryshme në Tiranë.
Gjithashtu, ai akuzohet edhe për fshehje pasurie, pasi dyshohet se është pronari “faktik” i restorantit “Gzona” tek Kalaja e Tiranës, si dhe i një automjeti që e ka në emër të bashkëpunëtorit të tij, po ashtu në burg, Ermal Kurtulaj.
Discussion about this post