Mëngjesin e sotëm, në emisionin “Koha për t’u zgjuar” , avokati Alban Duraj trajtoi ndryshimet e propozuara në Parlament lidhur me Kodin e Familjes dhe atë të Procedurës Civile.
Sipas Durajt, deputetja Klotilda Bushka ka propozuar ndryshime që prekin nenin 35 dhe nenin 510 të Kodit të Procedurës Civile. “Këto ndryshime, në pamje të parë, janë pozitive,” u shpreh ai. Objektivi kryesor i këtyre ndryshimeve është ulja e numrit të çështjeve që trajtohen nga gjykatat.
Një nga risitë kryesore është fakti se për çështjet që kanë të bëjnë me vlera të vogla, që nuk tejkalojnë 20-fishin e pagës minimale, do të ekzekutohet vetëm vendimi i gjykatës së shkallës së parë, pa nevojën e apelimit.
Për më tepër, ndryshimet propozojnë një mënyrë të re dhe më të shpejtë për zgjidhjen e divorcit. Bashkëshortët që vendosin të ndahen mund ta realizojnë këtë duke u paraqitur para noterit, së bashku me avokatët e tyre, për të marrë një titull ekzekutiv.
Këto ndryshime synojnë të lehtësojnë proceset gjyqësore dhe të reduktojnë ngarkesën në sistemin e drejtësisë.
Discussion about this post