Tjetër rast i dhunës në kopshte, nëna nga Korça akuzon edukatoren se i goditi djalin

Një denoncim tjetër për dhunën ndaj fëmijëve në kopshte ka ardhur këtë të premte në Euronews Albania.

Një nënë nga qyteti i Korçës ka denoncuar një rast të dhunimit të djalit të saj në kopshtin shtetëror Nr. 9.

Eriola Struga, nga minoriteti egjiptian shpjegon se djali i saj është abuzuar fizikisht në ambientet e kopshtit, ku ajo identifikoi shenja të goditjejes në fytyrë, megjithatë, sipas saj, nuk është ndërmarrë asnjë masë ndaj edukatores përgjegjëse, e cila vazhdon të punojë pa asnjë pasojë.

“Unë jam Eriola Struga, nëna e 3-vjeçarit të dhunuar në kopshtin Nr. 9 të Korçës. Dhuna ka ndodhur më 12 shtator, dhe pas 5 muajsh nuk ka pasur asnjë zhvillim,” tha ajo.

“Djali im ka vajtur më datë 12 në kopsht në orën 09:00 dhe ka qëndruar gjysëm ore ose treçerk ore duke qarë. Ndërkohë më merr edukatorja ne telefon dhe më thotë hajde merrë djalin se po qan për ty dhe i thashë nxirre jashtë se po e pres këtu në oborr. Fëmija del i traumatizuar duke qarë më ngashërim saqë nuk po mbushej dot as me fryme. E pyes edukatoren pse po qan sepse kur hyri e kishte me dëshirë dhe e marr djalin. Duke ecur në rrugë në dritë natyrale i shof shenja gishtash në fytyrë. E qetësoj djalin dhe pyes çfarë kë që po qan dhe djali më tha që më goditi këtu duke bërë me shenjë në vendin e goditjes në fytyrë”, tha Struga.

Në përpjekjen e saj për të siguruar prova, Eriola kërkoi që kamerat e kopshtit të hapeshin, por drejtoresha e institucionit u tregua refuzuese dhe i tha se “po kërkovee të hapen kamerat, atëherë nuk do të sjellësh më djalin këtu”.

Pas disa diskutimesh të forta, kamerat u hapën, por pamjet nuk ofruan prova të mjaftueshme pasi ndodhi në zonat ku nuk kishte kamera.

Duke pasur dyshime mbi procedurat dhe trajtimin e fëmijës së saj, Eriola denoncoi ngjarjen në polici dhe bëri thirrje për mbështetje psikologjike për djalin e saj.

Megjithatë, ajo nënvizon se situata ka mbetur e pandryshuar dhe edukatorja vazhdon të punojë në kopsht pa asnjë masë disiplinore të ndërmarrë.

“Rasti ka 4-5 muaj që ka ndodhur dhe edukatorja vazhdon qetësisht punën, nuk është marrë asnjë masë dhe nuk është bërë asgjë për mbështetje psikologjike për fëmijën tim,” tha ajo me zhgënjim.