KPA lë në fuqi shkarkimin e gjyqtarit të Durrësit

Kolegji i Posaçëm i Apelimit, KPA vendosi më 23 janar të lërë në fuqi shkarkimin nga detyra të gjyqtarit të Gjykatës së Durrësit, Shpëtim Reka.

Vendimi u mor në mënyrë unanime nga trupi gjykues i KPA i kryesuar nga Rezarta Schuetz, me relatore Mimoza Tasi dhe anëtarë Albana Shtylla, Natasha Mulaj e Sokol Çomo, pas shqyrtimit në dhomë këshillimi të ankimit të Rekës kundër vendimarrjes të Komisionit të Pavarur të Kualifikimit për shkarkimin e tij nga detyra.

Shpëtim Reka u shkarkua nga detyra më 25 shkurt 2022 pasi Komisioni konkludoi probleme në kriterin e pasurisë dhe në vlerësimin tërësor u konstatua se kishte cënuar besimin e publikut te sistemi i drejtësisë.

Reka e nisi karrierën në sistemin e drejtësisë në vitin 1994 dhe prej më shumë se dy dekadash shërbeu si gjyqtar në Gjykatën e Durrësit.