Janari mbyllet me shi dhe dëborë, në shkurt temperatura zbret në -8 gradë

Janari do të mbyllet me mot të ftohtë dhe reshje shiu dhe dëbore, ndërkohë që temperaturat do të ulen ndjeshëm.

Sipas meteorologëve, pas një periudhe me ditë relativisht të ngrohta, nesër do të rikthehen rrebeshet në territor, me reshje të shpeshta shiu dhe dëbore, veçanërisht në zonat malore mbi 1,000 metra. Temperaturat, që aktualisht janë rreth 20 gradë, do të ulen me 4-5 gradë, duke arritur 14-15 gradë Celsius.

“Janari ka regjistruar gjithsej 11 ditë të ftohta dhe, përkundër të ftohtit, ka qenë më i ngrohtë se janari i vitit të kaluar. Moti i ftohtë do të vazhdojë deri në fund të muajit, me reshje shiu dhe borë, ndërsa temperaturat do të mbeten të ulëta”.

Për shkurtin, meteorologët parashikojnë që muaji do të jetë më i ngrohtë se janari, megjithatë, do të ketë disa ditë me temperatura të ulëta. Nga data 4-9 shkurt, temperaturat do të bien ndjeshëm, me vlera që mund të arrijnë deri në -8 gradë në zonat malore dhe zero gradë në Tiranë dhe zonat e ulëta. Pjesa tjetër e muajit do të karakterizohet nga mot i qëndrueshëm, me reshje lokale dhe temperatura të ulëta, ndërsa nga 14-15 shkurt, temperaturat nuk do të kalojnë 10-14 gradë, edhe pse do të ketë diell.

Sipas meteorologëve, Europa do të përballet me një situatë të rënduar atmosferike, me stuhi ciklonike në Atlantik që do të godasin ishujt britanikë dhe Skandinavinë. Po ashtu, Ballkani do të ketë reshje dëbore, ndërsa Shqipëria, Mali i Zi, Kosova dhe Greqia do të preken kryesisht nga reshje shiu.