Ish-kryetari i Bashkisë Sarandë, Adrian Gurma është kallëzuar në Strukturën e Posaçme kundër Korrupsionit dhe Krimit të Organizuar. Kallëzimin për të e ka dorëzuar një nga anëtarët e Gjykatës së Lushnjës. Hazbi Balliu, një gjyqtar i Gjykatës Administrative në Lushnjë, ka depozituar kallëzim për veprat penale “Shpërdorim detyre” dhe “Zhdukje apo vjedhje dokumentesh” për një leje ndërtimi pa projekt arkitektonik.
Nga kjo çështje, Trëndelina Beqiri është pala e dëmtuar, ndaj edhe kallëzimi i saj është bashkangjitur me atë të Balliut dhe është dërguar në SPAK. Të dyja kallëzimet, fillimisht u administruan në prokurorinë e Sarandës, por për shkak se Adrian Gurma ka qenë funksionar i lartë, çështja do të hetohet nga SPAK.
Siç bën me dije për “OraNews”, gazetari Elton Qyno, rasti është zbuluar gjatë një seance gjyqësore, ku palë të përfshira në këtë proces janë Trëndelina Beqiri dhe subjekti “Noku OS 2008”. Teksa shqyrtonte dosjen, gjyqtari ka konstatuar se Bashkia e Sarandës me kryetar Adrian Gurma, në vitin 2017 ka lëshuar një lejë ndërtimi për subjektin privat “Noku OS 2008”. Leja e ndërtimit është miratuar, edhe pse nuk ka plotësuar një nga kriteret kryesore, atë të projektit arkitektonik.
Madje kompania ka ngritur edhe 2 kate të tjea pa leje.
Pasi ka konstatuar gjetjet, Balliu ka depozituar kallëzimin në SPAK, ku përveç Gurmës është edhe Dritan Hila, drejtor i Agjencisë Shtetrore të Kadastrës në Sarandë, i cili ka legalizuar pallatin e ndërtuar pa pasur asnjë projekt konkret.
Discussion about this post