Kolegji i Posaçëm i Apelimit, KPA shpalli të hënën më 3 shkurt vendimin për pushimin e gjykimit të vetingut të gjyqtarit të Gjykatës Administrative të Vlorës, Bevis Shehaj, duke pasjellë rikthimin e tij në detyrë, pasi ai është emëruar pas hyrjes në fuqi të ligjit të vetingut.
Vendimi u mor me shumicë votash nga trupi gjykues i Kolegjit i kryesuar nga Mimoza Tasi, me relatore Ina Rama dhe anëtarë Sokol Çomo, Albana Shtylla e Rezarta Schuetz, pas shqyrtimit në dhomë këshillimi të ankimit të gjyqtarit Shehaj.
Në janar të vitit 2020, gjyqtari Bevis Shehaj depozitoi në Komisionin e Pavarur të Kualifikimit (KPK) një kërkesë për mosfillimin e procedurës së rivlerësimit. Shehaj parashtronte se ishte emëruar në detyrë pas datës 22 korrik 2016, kur hyri në fuqi ligji për rivlerësimin kalimtar të magjistratëve dhe për rrjedhojë nuk ishte subjekt rivlerësimit.
Po ashtu, Shehaj sqaroi se ishte verifikuar nga institucionet përkatëse, ashtu si të gjithë magjistratët e rinj. Kjo kërkesë e subjektit u rrëzua me shumicë votash nga KPK, e cila e shkarkoi më pas me shumicë votash për kriterin e pasurisë.
Discussion about this post