Del foto/ Ky është i dënuari që u arratis gjatë natës nga burgu i Shënkollit, reagon Drejtoria e Burgjeve

Personi që shihni në foton e mësipërme është shtetasi Daut Laze, i cili u arratis gjatë natës së kaluar nga burgu i Shënkollit në Lezhë.

Ai ka qenë i dënuar për dhunë në familje, teksa dyshohet se ai vuan nga probleme të shëndetit mendor.

Ende nuk dihen rrethanat se si Daut Laze ka arritur gjatë natës të arratiset nga burgu. Policia po punon për gjetjen dhe kapjen e tij, si dhe kanë nisur hetimet për zbardhjen e plotë të arratisjes.

Autoritetet po verifikojnë edhe mundësinë e ndihmës së mundshme nga persona të tjerë.

Drejtoria e Përgjithshme e Burgjeve ka reaguar pas arratisjes së të burgosurit, Daut Laze nga burgu i Shënkollit në Lezhë, mbrëmjen së hënës.

Drejtoria e Burgjeve sqaron se i arratisuri është vendosur në pranga më 16 nëntor dhe ndaj tij Gjykata e Tiranës ka caktuar masën “Mjekim i detyruar në një institucion mjekësor”.

Raportohet se Daut Laze, pas kontrollit të menjëhershëm nga stafi i policisë në institucion, është vërejtur se ky i fundit ka shfrytëzuar hapësirat e mundshme, të cilat janë në parametrat e institucionit të posaçëm mjekësor, për tu larguar nga rrethimi i institucionit.

“Ai ishte arrestuar më 16 nëntor 2021. Me vendimin nr. 528, akti datë 4 nëntor 2024, Gjykata e Shkallës së Parë të Juridiksionit të Përgjithshëm Tiranë kishte vendosur ndaj tij masën mjekësore “Mjekim i detyruar në një institucion mjekësor”, sipas nenit 46 të Kodit Penal.

Pas kontrollit të menjëhershëm nga stafi i policisë në institucion, është vërejtur se ky shtetas me mjekim të detyruar ka shfrytëzuar hapësirat e mundshme të cilat janë në parametrat e institucionit të posaçëm mjekësor për tu larguar nga rrethimi i institucionit”, njoftoi sot Drejtoria e Përgjitshme e Burgjeve.