Skuadrat e Superligës shqiptare do të zbresin në fushë edhe në mesjave, por këtë herë në kupë, ku luhen duelet çerekfinale. 3 nga sfidat do të zhvillohen të mërkurën, ndërsa ajo mes Dinamos dhe Skënderbeut ditën e enjte. Të mërkurën në orën 13:30 luhen paralelisht Bylis-Egnatia dhe Laci-Partizani, një fotokopje e javës së fundit të luajtur në kampionat.
Në orën 17 është radha e Elbasanit e Vllaznisë të masin forcat me njëra-tjetrën, ndërsa përgatitjet kanë marrë fund.
“Sfida e radhës po na pret, nuk ka kohë, madje as për të shijuar fitoren e fundit ndaj Teutës. Kupa është një kompeticion që ne e kemi si objektiv, na pret një duel i vështirë. Përballemi me një ekip të mirë, trajner me eksperiencë, pra një skuadër që është investuar këtë sezon”, Thomas Brdaric, Trajner i Vllaznisë.
Sa i përket lojtarëve të dëmtuar te shkodranët, nuk ndryshon asgjë.
“Fatkeqësisht s’kemi rikthime, Qato e Spahiu kanë nevojë për kohë për tu rikuperuar. Jemi ekip kompetitiv, fryma e grupit është pozitive, fitorja ndaj Teutës na jep shtysë edhe për Elbasanin”, Thomas Brdaric, Trajner i Vllaznisë.
Dy përballjet e fundit mes tyre janë mbyllur njëra në barazim dhe tjetra me fitoren e shkodranëve.
Discussion about this post