Përfshihet nga zjarri spitali i Neurologjisë? Reagon QSUT: Konstatuam tym…

Një incident është regjistruar mbrëmjen e djeshme në spitalin e Neurologjisë në Qendrën Spitalore Universitare Nënë Tereza në Tiranë.

Mësohet se në katin -1 të spitalit të Neurologjisë është konstatuar prani tymi dhe ky fakt konfirmohet edhe nga vetë QSUNT-ja përmes një komunikate për mediat.

Nuk sqarohet se çfarë ka ndodhur konkretisht, por bëhet me dije se nuk ka patur asnjë rrezik për pacientët apo stafin dhe se vijon shërbimi normal.

Burime bëjnë me dije se ky ambient përdorej si magazinë ku kishte dyshek e sende të tjera, por jo pajisje spitalore. Mësohet se situata u vu në kontroll brenda 10 minutash nga shërbimet zjarrfikëse, në mënyrë që të mos dilte jashtë kontrollit.

Nga veprimet paraprake dyshohet për një ngjarje aksidentale, por ekspertiza sot do të përcaktojë shkakun.

Reagimi:

Mbrëmjen e djeshme, rreth orës 21:45, në katin -1 të Spitalit të Neurologjisë është konstatuar prani tymi, pa asnjë rrezik për pacientët apo stafin.

Stafi mjekësor dhe ekipet teknike kanë ndërhyrë për të vlerësuar situatën dhe garantuar vijimin normal të shërbimit.

Aktualisht në ambientet e spitalit nuk ka asnjë rrezik pêr pacientët apo personelin dhe puna vijon pa asnjë pengesë.

Autoritetet përkatëse janë njoftuar për të kryer verifikimet e nevojshme dhe për të siguruar që gjithçka është në parametra të sigurt.