Një ditë më parë mbushi 40 vjeç, por Cristiano Ronaldo vijon të luajë dhe nuk ka të ndalur…as nga dëmtimet. Me 923 gola të shënuar në karrierë, portugezi shpreson të kapë shifrën 1 mijë, kjo edhe në sajë të formës fizike.
Pasi kaloi mbi dy dekada duke luajtur futboll në nivelin më të lartë në Evropë, Cristiano Ronaldo iu bashkua Al-Nassr në janar 2023 pasi ndërpreu kontratën me Manchester United. Portugezi ka shënuar tashmë 81 gola dhe 19 asistime në 89 ndeshje klubesh në të gjitha garat për arabët.
Pavarësisht se ka një karrierë kaq të gjatë, ylli portugez ka shmangur lëndimet e rënda dhe vazhdon të luajë rregullisht për klubin dhe kombëtaren. Që nga sezoni 2007-08, Cristiano Ronaldo ka humbur vetëm 83 ndeshje për klubin dhe kombëtaren për shkak të lëndimeve.
Profesori i fiziologjisë së ushtrimeve, Rafael Oliveira ka shpjeguar së fundmi se si Cristiano Ronaldo shmang lëndimet edhe në moshën 40-vjeçare. Legjenda portugeze vështirë se ka shfaqur ndonjë shenjë ngadalësimi pavarësisht se është afër fundit të karrierës së tij.
Në një intervistë të fundit me ‘O Jogo’, profesori Rafael Oliveira u pyet për arsyen e mungesës së lëndimeve të mëdha të Ronaldos, pavarësisht moshës së tij të avancuar.
Ai tha: “Cristiano sigurisht që ka tregues të mirë gjenetike për të shmangur kaq shumë lëndime, pa dyshim. Dhe ka lojtarë të tjerë që pavarësisht se sa shumë stërviten, lëndohen vazhdimisht, ose sistematikisht, ose kanë më shumë gjasa të lëndohen”.
“Nuk e kam analizuar, nuk mund ta them. Ka disa video analizash për të, por nuk mund ta them këtë 100 përqind, por imagjinoj se ai ka një teknikë vrapimi që është shumë afër perfektit, ndërsa ka lojtarë të tjerë që ndoshta nuk i kanë këto teknika aq të fituara dhe pastaj janë më të prirur ndaj lëndimeve”, shtoi ai.
Oliveira shtoi gjithashtu se “strategjitë e rikuperimit” dhe “vullneti” i Ronaldos janë çelësi për aftësinë e tij.
“Mendoj se ai është shembulli më i mirë nga të gjithë në aspektin profesional, në të cilin duhet të ketë pasur shumë pak përjashtime gjatë gjithë jetës së Cristianos, në të cilat ai nuk i ka zbatuar këto rregulla në mënyrë shumë metodike. Prandaj, që nga ajo pikë, mund të arrish atë moshë dhe të jesh ende në gjendje të performosh në mënyrë të shkëlqyer”, përfundoi profesori.
Discussion about this post