Në pritje të gjyqit të të riut të dyshuar si vrasës i bashkëmoshatarit Martin Cani, prokuroria ka kërkuar një hetim të veçuar për të përcaktuar anëtarë të stafit shkollor që shpërdoruan detyrën duke neglizhuar konfliktin mes nxënësve.
Hetuesit kanë marrë gjithashtu dëshminë e oficeres së sigurisë së shkollës me inicialet J. K., e cila e ushtronte detyrën në “Fan Noli’ prej një viti e gjysmë.
Dëshmitarja tregon se menjëherë mbasi u informua për konfliktin mes nxënësve, ka njoftuar drejtoreshën e shkollës “Fan Noli”, mësuesen kujdestare dhe psikologen.
Oficerja kishte mësuar për sherrin mes Mario Përlleshaj, autori i arrestuar, dhe viktimës Martin Cani nga një mësuese që dëgjoi sharjet mes tyre.
“Shkova në tualet dhe vura re që nxënësit nuk ishin atje. Më pas thirra Martin Canin që më tha se kur kishte hyrë në këto ambiente kishte sharë kot dhe se Mario Përlleshaj e kishte marrë personale me të. Thirra Marion dhe më tha se nuk kishte asnjë problem me të, të dy ishin të qetë me njëri-tjetrin”, shprehet oficerja për grupin e hetimit.
Por mbas orës së 6-të të mësimit ajo mori dijeni për krimin e ndodhur.
14-vjeçari Mario Përlleshaj i akuzuar për vrasje në rrethana cilësuese të fëmijës, shprehet në dëshmi se e njihte Martinin si një nxënës të klasë së 9 paralele.
“Nuk kam patur konflikt më parë. Atë ditë dola nga shkolla isha së bashku me shokun tim. Në atë moment më thirri Martini i cili ishte me dy apo më shumë persona që nuk i njihja. U ndava nga shoku im dhe u afrova tek Martini që më tha të shkoja me të, të sqarohesha, pa më thënë çfarë. Ecëm përpara dhe shokët e tij na ndiqnin pas. Pasi ndaluam më goditën”, deklaron Mario, i cili këmbëngul se nuk mban mend të ketë përdorur thikë.
Mario Përlleshaj vazhdon të mbahet në burgun e të miturve, pasi siç thotë gjykata, vepra për të cilën dyshohet ajo e “vrasjes në rrethana cilësuese ndaj një të mituri”, është një krim për të cilin ligji parashikon dënimin njëzet vjet ose burgim të përjetshëm.
Discussion about this post