Është arrestuar njëri nga personat e dyshuar si autor i vrasjes së dy shqiptarëve në Bazel të Zvicrës në mars të vitit të kaluar. Sipas Prokurorisë Publike të Bazelit, i arrestuari është një 41-vjeçar nga Shqipëria por identiteti nuk është bërë publik ende. Kërkimet vazhdojnë edhe për një autor të dytë i cili dyshohet se është po shqiptar, ndërsa Gjykata e Apelit ka urdhëruar paraburgim prej tre muajsh për të arrestuarin.
Ngjarja
Më 9 mars, rreth orës 20.15 në Bazel, në një lokal me emrin “Cafe 56” janë dëgjuar të shtëna me armë. Si rezultat, janë vrarë dy persona ndërsa një tjetër ka mbetur me plagë të rënda, ka bërë të ditur Prokuroria Publike e Kantonit të Bazelit.
Prokuroria ka ndërtuar ngjarjen dhe sipas saj, dy persona meshkuj kanë hyrë në lokalin e përmendur dhe kanë shtënë disa herë me armë. Më pas ata janë larguar në drejtim të stacionit Badischer Bahnhof. Në lokal ka pasur edhe njerëz të tjerë, të cilët kanë shpëtuar të palënduar. Lokali është frekuentuar më shumë nga shqiptarët. Personi i plagosur rëndë, pasi që është lëshuar nga spitali, është kthyer në Shqipëri.
Discussion about this post