I arrestuar në mesditë në banesën e tij në Shkodër, Safet Bajri u dërgua në ambientet e Drejtorisë së Policisë së Tiranës. “I forti” i Dobraçit shihej i qeshur para kamerave. Pasi ka qëndruar për pak kohë tek Drejtoria e Policisë në Tiranë, ai është dërguar tek Blloku i Sigurisë.
Safet Bajri u arrestua me urdhër të SPAK për vrasjen e Fatbardh Licit në vitin 2018. Bajri është i dyshuar edhe për masakrën e Dobraçit të 30 tetorit 2024, me 4 viktima. Nga atentati humbën jetën prej breshërisë së plumbave Hamza Lici dhe Arlind Bushati, si dhe çifti i bashkëshortëve Bashkim e Flutura Basha të cilët nuk kishin lidhje me ngjarjen, por u goditën nga automjeti i viktimave, teksa po udhëtonin me motor.
Gjithashtu, grupi i Safet Bajrit dyshohet edhe për atentatin ndaj Aleksandër Prendit në gusht 2024 kur “ushtarët” e tij Izmir Sakica dhe Samuel Troshani bashkë me tre automjete të blinduara u ndeshën me breshërinë e plumbave pranë banesës së shënjestrës.
Samuel Troshani dhe Izmir Sakica kanë masa sigurie edhe për një ngjarje tjetër, tentativën për të vrarë Vladimir Bruçin, por edhe për masakrën e Dobraçit. Mësohet se hetimi i SPAK ndaj Safet Bajrit është mbajtur në sekret të plotë. Safet Bajri do të përballet me Gjykatën e Posaçme.
Discussion about this post