Kryetari i Partisë Demokratike, Sali Berisha, ka komentuar deklaratat e ish-zëvendëskryeministrit Arben Ahmetaj për aferat korruptive të kryeministrit Edi Rama.
Berisha ka deklaruar se i beson të gjitha dëshmitë e Ahmetaj kundër Ramës, pasi ky i fundit nuk i kundërshtoi asnjëherë ato.
Gjithashtu Berisha theksoi se arrestimet e ish-presidentit Ilir Meta dhe deputetit të PD, Ervin Salianji ndikuan negativisht te qytetarët pasi panë që mund të arrestoheshin, por nga ana tjetër ato sollën shpërthimet e shqiptarëve në diasporë, pasi janë shpërthime kundër diktaturës.
“Çdo popull do derdhej në rrugë me ato dëshmi që bëri Arben Ahmetaj. Rama nuk ka kundërshtuar asnjë të vetme, as atë që ia ka imponuar Erion Veliaj firmën për djegësin e Tiranës. Unë e besoj plotësisht atë dhe prandaj Veliaj po i çon çdo ditë habere nga qelia.
Opozita dhe populli është në një klimë terrori. Nuk ka popull në botë që të ketë parë një ish-president të zvarritet rrugës. Po t’i çohej mandati ai do paraqitej vetë, por jo ai duhet të kundërshtonte.
A ndikoi burgosja e Ervin Salianjit? Po ndikoi sepse Edi Rama tregoi se mund të arrestonte këdo.
Por ndikoi edhe nga ana tjetër, dhe ja ku janë shpërthimet, janë shpërthime kundër diktaturës.
Edi Rama po flet me veten dhe pas zgjedhjeve do të shkojë të flasë edhe në një vend tjetër.
Njëherë i ra tavolinës me grushte por mund t’i bjerë edhe me kokë, por po i ra me kokë, ai është edhe i konsumuar dhe s’dihet a ngrihet më“, tha Berisha në Syri TV.
Discussion about this post