Vrasja e 67-vjeçarit në Kurbin/ Arrestohet autori i dyshuar, gjendet arma e zjarrit (Emri)

Policia e Kurbinit ka identifikuar dhe arrestuar autorin e dyshuar të vrasjes së ndodhur mbrëmjen e së hënës në fshatin Vilëz.

Burimet zyrtare bëjnë të ditur se shkak për ngjarjen janë bërë konfliktet për pronësinë, ndërsa në pranga është vënë shtetasi Dashnor Tota, 53 vjeç.

Njoftimi i policise

Dyshohet se vrau me armë zjari, një 67-vjeçar, dje, në fshatin Vilëz, si rezultat i kontrolleve intensive nga Policia, kapet dhe vihet në pranga 53-vjeçari.

Operacioni për lokalizimin dhe kapjen e këtij shtetasi u zhvillua pa ndërprerë nga shërbimet operacionale të DVP Lezhë, në bashkëpunim me shërbimet e Forcës Kombëtare të Sigurisë, Njësia Shkodër.

Gjatë operacionit janë ushtruar kontrolle në të gjithë territorin e fshatit ku ndodhi ngjarja dhe në zonat përreth. Si rezultat, mesditën e sotme, është lokalizuar në fshatin Vilëz, është kapur dhe vënë në pranga shtetasi:

D. T., 53 vjeç, banues në fshatin Zhejë, Kurbin.

Në momentin e kapjes nga Policia, këtij shtetasi i është gjetur arma e zjarrit me të cilën dyshohet se ka vrarë 67-vjeçarin D. M., për motive pronësie.

Në drejtimin e Prokurorisë vijojnë hetimet për dokumentimin e rrethanave dhe shkakut të vrasjes.

Materialet procedurale do t’i kalojnë Prokurorisë, për veprime të mëtejshme.