Policia e Kosovës ka arrestuar dy persona në Malishevë pasi nuk iu bindën urdhrit për të ndaluar. Zëdhënësi i Policisë së Kosovës për Rajonin e Gjakovës, Nysret Gjurkaj tha për mediat kosovare se të njëjtët kanë fyer zyrtarët policorë dhe kanë shfaqur rezistencë gjatë arrestimit.
Rreth orës 14:00, patrulla e policisë ishte ne pikë kontrolli të automjeteve ne rrugën Adem Jashari në Malishevë. Aaty kishin kaluar dy persona me makinën e tyre “Mercedes”. Policia ka kërkuar që kjo makinë të ndalojë, por përkundër thirrjes së policisë, të rinjtë nuk i janë bindur urdhrit të policisë, por kanë rritur shpejtësinë dhe ishin larguar që aty.
Më pas patrulla e policisë i është vënë pas dhe pasi kanë mbërritur afër, ka sinjalizuar të rinjtë që të ndalojnë, por ata përsëri nuk janë bindur. Të rinjtë kanë vazhduar rrugën deri në Malishevë.
Kur kishin arritur në hyrje të oborrit të dyshuarit kishin tentuar që të hynin brenda në shtëpi edhe pse ishin paralajmëruar nga policia që të ndalen. Pas kësaj të dyshuarit ishin arrestuar dhe që gjatë arrestimit kanë fyer policët dhe i kishin kërcënuar me fjalët “Keni për ta parë se kush jemi ne, për këtë punë keni për të pasur punë privatisht me ne”.
Pas arrestimit të dyshuarit janë marrë në pyetje lidhur me veprimet e tyre të cilët i kanë pranuar. Sipas tyre, arsyeja e mosndaljes në pikën e kontrollit ka qenë sepse ata nuk kishin patenta dhe nga frika kishin vepruar në atë mënyrë. Lidhur me rastin është njoftuar prokurori kujdestar dhe me vendim të tij dy të dyshuarit janë mbajtur për 48 orë në paraburgim.
Discussion about this post