Video – Sekuestrohen 11 kg kanabis në Tiranë, 4 të arrestuar (Emrat)

Katër persona janë arrestuar nga policia në kryeqytet pasi u kapën duke transportuar 11 kilogramë kanabis.

Uniformat blu sqarojnë se në kuadër të operacionit “Carry on” u arrestuan Jetlir Mulkurtaj, Gjonald Hazizi, Jetmir Mulkurtaj dhe Ormal Ismaili.

“Sektori për Hetimin e Narkotikëve, në bashkëpunim me Sektorin e Forcës Operacionale, të DVP Tiranë, në kuadër të një procedimi proaktiv, nën drejtimin e Prokurorisë, pas një pune hetimore tremujore, ka organizuar dhe ka finalizuar operacionin policor të koduar “Carry on”. Si rezultat i këtij operacioni u arrestuan shtetasit: J. M, 27 vjeç dhe J. M., 35 vjeç të dy banues në Tropojë; Gj. H., 28 vjeç dhe O. I., 35 vjeç, të dy banues në Tiranë”, njofton policia.

Katër të rinjtë u ndaluan në zonën e Kodrës së Diellit, ndërsa iu sekuestrua lënda narkotike, automjeti tip “Benz” me të cilin lëviznin dhe 5 celularë.

“Gjatë operacionit, në rrugën ‘Bill Klinton’, shërbimet e Policisë kanë ndaluar automjetin tip ‘Benz’, në të cilin gjatë kontrollit, në bagazh, janë gjetur dhe sekuestruar 2 thasë të mbushur me lëndë të dyshuar narkotike kanabis, me peshë totale 11 kg”, informon policia.

Lënda narkotike u sekuestrua në cilësinë e provës materiale, bashkë me automjetin dhe 5 celularë.