Kryeqyteti u trondit dje nga gjetja pa jetë e një vajze 24-vjeçare nga autoritetet. Ajo rezultoi të ishte një shtetase palestineze që nuk kishte shumë kohë që kishte hyrë në kufijtë e Shqipërisë.
Trupi i 24-vjeçares u gjet i pajetë nga pronari i banesës në rrugën “Gjon Muzaka”, pranë Bllokut të Ambasadave, i cili më pas lajmëroi policinë.
Në një video të siguruar së fundmi brenda ambjenteve të aeroportit, shihet që Ryan Alwan dhe partneri i saj, Fadi Alwan, mbërrijnë më 19 shkurt.
Nga të dhënat e deritanishme hetimore, dyshohet se autori i ngjarjes është larguar menjëherë jashtë territorit të Shqipërisë, pas kryerjes së krimit, i cili dyshohet të ketë ndodhur disa ditë më parë.
Për të dhënë më shumë mbi këtë ngjarje të veshur me mister, ishte gazetarja Anila Hoxha e ftuar në emisionin Breaking në Top News.
“Ky krim u njoftua nga pronarja e apartamentit me qira, ajo kishte vënë re që nuk kishte më asnjë lëvizje në apartament, askush nuk po lëvizte dhe këtu lindën dyshimet. Policia e gjeti të vrarë në banesë të renë, të cilën nuk po e identifikonte dot. Partneri i saj është larguar drejt Athinës nga Rinasi më datë 22 shkurt. Destinacioni i tij final ishte Amsterdami.
I dyshuari kishte fshirë çdo gjurmë, edhe gjakun, kur del nga banesa del me një qese në dorë, ku mendohet se ka hedhur të gjitha mjetet. Dyshohet se ai kishte goditur brutalisht partneren dhe më pas e kishte goditur me thikë. Ata janë paraqitur si turistë.
Nga përshkrimi i zonjës së shtëpisë kishin paguar për 10 ditë, ata flisnin gjermanisht dhe një gjuhë të Lindjes së Mesme. Erdhën nga Berlini drejt Tiranës. Nuk dihet nëse ka patur një konflikt banal mes çiftit. Nuk dihet se kur është qëlluar tamam për vdekje e reja. Grupi hetimor ka bindjen se partneri është autori në bazë të kamerave të sigurisë, sepse nuk ka patur të tjera lëvizje të dyshimta,” tha gazetarja Hoxha.
Discussion about this post