Në një aktivitet të mbajtur këtë të shtunë me rastin e 8 Marsit, kryeministri Edi Rama u bëri një thirrje të pazakontë grave shqiptare: të ndalojnë burrat të votojnë në zgjedhjet e 11 majit. “Burrat mbajini në shtëpi më 11 maj”, theksoi ai.
Gjiashthu, Rama sugjeroi se gratë janë më të arsyeshme se burrat kur është fjala për të ushtruar të drejtën e votës, ndërsa burrat i cilësoi si “tifozë” dhe “skandalozë”.
“Nuk është e rastit që PS e votojnë më shume gra se sa burrat. Nëse do votonin vetëm gratë në Shqipëri ne do merrnin 90 deputetë. Këto janë shifrat. Dhe të them të drejtën nëse duhet zgjedh mes votës së një gruaja dhe të një burri, unë them votën e gruas. Sepse është më shumë se sa një votë, është një vendim. Gratë nënat nuk janë tifoze, burrat janë tifozë, janë skandalozë. Gratë janë nëna, motra, bija që kanë të lindur brenda vetes kujdesin për atë që vjen nesër. Gratë e ndërtojnë fatin”, tha Rama.
Kjo deklaratë, edhe pse mund të jetë bërë në një kontekst simbolik, ngre pikëpyetje mbi aspektet ligjore dhe morale të një thirrjeje të tillë.
E drejta për të votuar është një nga parimet themelore të demokracisë dhe është e garantuar nga Kushtetuta e Republikës së Shqipërisë, si dhe nga konventat ndërkombëtare për të drejtat e njeriut. Neni 45 i Kushtetutës shqiptare përcakton se “çdo shtetas shqiptar që ka mbushur moshën 18 vjeç ka të drejtën të zgjedhë dhe të zgjidhet”.
Çdo përpjekje për të ndaluar një grup të caktuar qytetarësh nga pjesëmarrja në votime mund të konsiderohet si cënim i të drejtës kushtetuese për të zgjedhur. Edhe pse deklarata e Ramës nuk ka fuqi ligjore dhe nuk mund të detyrojë askënd të veprojë në këtë mënyrë, ajo mund të perceptohet si një mesazh që shkon kundër frymës demokratike të vendit.
Gjithashtu, në një shoqëri që synon të promovojë barazinë gjinore dhe pjesëmarrjen e barabartë të qytetarëve në vendimmarrje, një deklaratë e tillë ngre shqetësime mbi mesazhin që përcillet. Nëse do të ishte bërë në kahun e kundërt — pra, një thirrje për të ndaluar gratë të votojnë, do të kishte shkaktuar një reagim të ashpër dhe do të ishte konsideruar një mesazh diskriminues. Një tjetër aspekt etik është se liderët politikë duhet të jenë të kujdesshëm në komunikimin e tyre publik, sidomos në çështje që lidhen me të drejtat themelore të qytetarëve.
Pavarësisht kontekstit në të cilin u bë kjo deklaratë, mesazhi i saj ngre pyetje serioze mbi mënyrën se si kryeministri Edi Rama trajton proceset demokratike. E drejta e votës është një e drejtë e patjetërsueshme dhe çdo sugjerim, qoftë edhe në formë shakaje, për të ndaluar një grup qytetarësh nga ushtrimi i kësaj të drejte, duhet të trajtohet me kujdes. Në një shoqëri demokratike, vendimet e qytetarëve në kutinë e votimit nuk duhet të ndikohen nga presioni, përjashtimi apo thirrjet për bojkot selektiv. Po ashtu, një diskurs politik që ndan votuesit mbi bazë gjinore nuk i shërben një demokracie të shëndetshme.
Discussion about this post