Ish-nënkryetari i Partisë Demokratike, Edi Paloka, ka reaguar ndaj replikave të vazhdueshme mes kreut të PD-së Lulzim Basha dhe të vetquajturit Komsion i Përkohshëm i Themelit. Paloka nis shkrimin e tij, duke theksuar se gjatë këtyre 8 viteve në opozitë, posti i ka imponuar një qëndrim më pak agresiv ndaj kreut të PD-së, gjë për të cilën mban përgjegjësi.
“Një mesazh dhe një propozim të fundit për Lulzim Bashën! Bashkëpunimi prej 8 vitesh në opozitë , si nënkryetar i PD, më ka imponuar gjatë kësaj kohe, një qëndrim më të tërhequr e më pak agresiv ndaj teje. Ky qëndrim ka ardhur jo vetëm për hir të marrdhënies personale gjatë këtyre viteve, por kryesisht si marrje përgjegjësie mbi veten për aq sa më takon nga funksionet drejtuese që kam mbajtur në PD”, shkruan Paloka.
Ai flet për bindjen e tij dhe pozicionimin krah Berishës dhe përballë Bashës, pasi sipas tij kjo ishte e drejta, ndërsa thekson se të gjithë drejtuesit e PD-së duhej t’i ishin bindur vullnetit të shumicës, që sipas tij u bë bashkë në 11 dhjetor.
“Nga 9 shtatori jam pozicionuar qartë në krah të Berishës, për shumë arsye, po mbi të gjitha me bindjen se jam në krahun e së drejtës. Më pas ju binda vullnetit të shumicës absolute të demokratëve për mbledhjen e Kuvendit të 11 dhjetorit, siç duhet të kishin bërë të gjithë drejtuesit e PD duke filluar nga ty i pari”, shkruan ai.
Paloka akuzon Bashën se ka vënë interesin e tij para interesit të demokratëve dhe mbi këtë parim ka ngritur të gjitha qëndrimet e mëtejshme, duke hedhur poshtë sakrificat e demokratëve.
“Ndërkaq ti zgjodhe që perballë vullnetit dhe interesit të demokratëve të mbrojë interesin tënd , lidhur tek karrigia e kryetarit të opozitës e në funksion të këtij interesi ngrite gjithë qëndrimet e mëtejshme duke ju dhënë goditje pas goditjesh atyre që për tetë vite luftuan e sakrifikuan për ty”, u shpreh Paloka.
Paloka i bën thirrje Bashës që të zhvillojë zgjedhje brenda PD-së në të gjitha strukturat, si e vetmja formë për t’i dhënë fund përplasjeve brenda llojit.
“E kam thënë që në fillim të “konfliktit” se vetëm VOTA e demokratëve e zgjidh problemin. Në këto kushte, mbetet dhe një hapsirë e fundit ; zgjedhjet në PD për të gjitha strukturat , përfshi dhe kryetarin e PD. Demokratët të vendosin me votën e tyre sepse vetëm kështu qëndrojmë të bashkuar dhe gjithë energjitë tona i përqendrojmë në luftën kundër Ramës. Bëhu pjesë e këtij procesi. Kush fiton drejton! Por edhe ai qe humbet , nuk humb përfundimisht!”, shprehet Paloka.
Discussion about this post