Në seancën gjyqësore të kësaj të mërkure, kryebashkiaku i Tiranës Erion Veliaj është ankuar për përgjimet e SPAK ndaj tij dhe familjarëve, që prokuroria i ka paraqitur si prova të reja në Apelin e GJKKO. Gjithashtu, ai ka konfirmuar se i qëndron deklaratave të tij publike, përmes së cilave ka sulmuar drejtësinë, kryesisht prokurorin e dosjes hetimore në ngarkim të tij, Ols Dado.
Seanca e sotme në Apel, ku Veliaj kërkon rrëzimin e masës së sigurisë arrest me burg, nisi me kundërshtimet e avokatëve të kryebashkiakut ndaj provave të reja të paraqitura nga SPAK, që nga ana e saj, kërkon mbajtjen në qeli të kryetarit të bashkisë.
Në deklaratën para gjyqtarëve dhe dy prokurorëve Ols Dado dhe Altin Dumani, sipas burimeve, Veliaj ka deklaruar se i qëndron çdo postimi që ka bërë në rrjetet sociale.
“Unë jam ende kryetar bashkie në detyrë i votuar nga çerek milion njerëz, unë i qëndroj çdo postimi që kam bëre në rrejte sociale”, mësohet të ketë thënë Veliaj, i cili që pas arrestimit, ka zhvilluar një fushatë të ashpër sulmesh publike ndaj drejtësisë, kryesisht prokurorit të dosjes në ngarkim të Ols Dado dhe gjyqtarit të posaçëm që pranoi kërkesën e SPAK duke miratuar masën e arrestit me burg.
Në gjykatë, Veliaj ka kundërshtuar SPAK, duke u shprehur se provat e reja janë çimka dhe telefonatat e tij me djalin, si edhe familjen.
Erion Veliaj tha se SPAK ka përgjuar 1 muaj bisedat e tij familjare që sipas kryebashkiakut, kanë të bëjnë me intervistat në media.
“Ju nuk keni konsideruar prova të reja sulmet publike të Sali Berishës ndaj SPAK. Por keni konsideruar prova të reja çimkat dhe telefonatat e mia me djalin dhe familjen dhe interesimin tim për intervista në TV kryesore“, mësohet se është shprehur Erion Veliaj.
Ai ka kërkuar seancë me dyer të hapura.
Lexo edhe:
Ankimi për masën e sigurisë/ Veliaj drejt një dështimi të ri në betejën me drejtësinë
Discussion about this post