Deputeti demokrat Dashnor Sula pasi u la jashtë nga lista e Partisë Demokratike, në zgjedhjet e 11 majit do të kandidojë si deputet në listën e një tjetër subjekti zgjedhor, atë të koalicionit “Nisma Shqipëria Bëhet” e drejtuar nga Adriatik Lapaj.
Me anë të një statusi në Facebook, Sula u drejtohet qytetarëve të Elbasanit ku shprehet se demokratët e këtij qarku do i përfaqësoje në parlament nën siglën e koalicionit “Nisma Shqipëria Bëhet”.
Dashnor Sula ka shprehur gjithashtu mirënjohjen për Adriatik Lapaj, Endri Shabani dhe Pano Sokon që e ftuan të kandidojë në këtë koalicion në zgjedhjet e 11 majit pasi sipas tij “mora medaljen si SPAKIST” nga Partia Demokratike.
Ai shton se nuk ka qenë zgjedhja e tij largimi nga Partia Demokratike në të cilën ka kontribuar për 20 vite, ndërsa thekson se do të jetë “SPAK-ist” edhe në Parlamentin e ardhshëm.
“Të dashur miq. Jam i lumtur t’u njoftoj se demokratët e Elbasanit do ti përfaqësoj në Parlamentin e ardhshëm nën siglën e koalicionit “Nisma Shqipëria Bëhet”. U jam shumë mirënjohës Adriatik Lapaj, Endri Shabani dhe Pano Soko, këtyre djemve të rinj dhe të papërfolur, që më ftuan të kandidoj në zgjedhjet e 11 majit. Unë i falenderoj dhe shpreh mirënjohje edhe për drejtuesit e forcave te tjera politike që për etikë nuk po i përmend që më ftuan të bashkohesha në ekipin e tyre pas medalies që më dhanë si “SPAKIST”. Mendoj se Shqipëria Bëhet dhe bëhet vetëm me djem të rinj. Nga sot, do të nis takimet me përkrahësit e mi, të cilët edhe në një ditë shumë të vështirë si ajo e djeshmja, më qëndruan pranë dhe më mbështetën. U kërkoj ndjesë të gjithë atyre që nuk kam arritur tu përgjigjem, ju falenderoj përzermërsisht për fjalët. Ma besoni, nuk ishte zgjedhja ime të largohesha nga Partia Demokratike. I kam dhënë asaj partie 20 vite të jetës sime politike, pa i kërkuar asnjë ofiq në kohën kur ishte në pushtet”, shkruan Sula në një postim në rrjetet sociale.
“Kam sakrifikuar kohën time, i kam hyrë në hak familjes sime dhe fëmijëve të mi, për të punuar cdo ditë për PD-në, por nuk mund të lejoja që kontributi im të hidhej në koshin e plehrave vetëm se kam shprehur mbështetjen time të palëkundur për institucionet e reformës në Drejtësi. Po e them që tani, SPAK-ist do të jem edhe në Parlamentin e ardhshëm sepse besoj që po i bën vendit një shërbim që kjo klasë politike nuk ka arritur tia bëjë në 35 vite. Na priftë e mbara deri në 11 Maj”, shton ai.
Discussion about this post