Dash Sulën ‘e zhdukin’ edhe nga lista e koalicionit ‘Shqipëria Bëhet’, Endri Shabani e konfirmon

Kreu i Nismës Thurje (pjesë e koalicionit ‘Shqipëria Bëhet’), Endri Shabani, është shprehur se deputeti i PD-së, Dashnor Sula, nuk do të jetë pjesë e listave të kandidatëve për deputetë të koalicionit të drejtuar nga Adriatik Lapaj.

Në ‘Ditari i Pasdites’ në A2 CNN, Shabani tha se arsyeja që emri i tij ka qarkulluar në lista, ka qenë për shkak të një diskutimi paraprak që është zhvilluar, pasi Sula u tërhoq nga listat e PD-së.

“Ne duam të konsolidojmë drejtësinë. Çdo njeri që mbështet SPAK është i mirëpritur. Çdo njeri që mbështet garën në shoqërinë shqiptare, është i mirëpritur të bashkohet. Çdo njeri që nuk ka qenë pjesë e çetës që ka vjedhur Shqipërinë, është i mirëpritur të bashkohet. Dashnor Sula nuk do jetë pjesë e listave tona.

Emrin nuk e ka, ka pasur një diskutim paraprak dhe për këtë arsye ka figuruar emri i tij në lista. Personalisht kam vlerësuar punën e zotit Dash Sula, që është nga të vetmit që ka folur për fermerët, që ka folur pro SPAK. Kur ka treguar gatishmëri për të bashkëpunuar, e ka pasur derën e hapur”, tha Endri Shabani.

Deputeti demokrat Dashnor Sula pasi u la jashtë nga lista e Partisë Demokratike, në zgjedhjet e 11 majit u shpreh se do të kandidojë si deputet në listën e një tjetër subjekti zgjedhor, atë të koalicionit “Nisma Shqipëria Bëhet” e drejtuar nga Adriatik Lapaj.

Me anë të një statusi në Facebook, Sula u drejtohet qytetarëve të Elbasanit ku shprehet se demokratët e këtij qarku do i përfaqësoje në parlament nën siglën e koalicionit “Nisma Shqipëria Bëhet”.

Berisha nuk e kurseu as sot mesazhin për deputetin Dashnor Sula, i cili mbeti jashtë listave të PD për zgjedhjet e 11 majit.

Sula në limitet e kohës për regjistrimin në KQZ iu bashkua koalicionit “Nisma–Shqipëria Bëhet”, si pjesë e listës së hapur të kandidatëve në Elbasan. Më herët, këtë lëvizje të deputetit, Berisha e ka cilësuar të gabuar.

“Dashnor Sula bëri zgjedhjen e tij, midis betejës në sheshin e burrave zgjodhi Tikun dhe iku në punën e tij, ka kohë ta mendojë”, tha sot kryedemokrati nga Elbasani.