Kreu i Lëvizjes Bashkë, Arlind Qori, ka shprehur pritshmëri të larta për zgjedhjet parlamentare të 11 majit, duke theksuar se partia e tij është në rritje të vazhdueshme dhe synon përfaqësim në të gjitha qarqet.
Në një intervistë për News24, ai u shpreh se në vitin 2023 Lëvizja Bashkë mori 5% të votave në Tiranë dhe tani pret një rezultat edhe më të lartë.
“Në vitin 2023 kemi marrë 5% të votave në Tiranë dhe tani presim të kemi shumë më shumë. Bazohem në dyfishimin e anëtarëve tanë, bazohem në ndjesinë në raport me qytetarët si edhe sistemi i vjetër politik është në një krizë identiteti të thellë. Lëvizja bashkë ndodhet në zgjedhje për të përfaqësuar ndryshimin. Ne do synojmë të përfaqësohemi me deputetë në të gjitha qarqet. Ne kemi listën tonë më të mirë në qarkun e Kukësit”, tha ai.
Duke kritikuar partitë e tjera, Qori theksoi se ato ose janë të korruptuara, ose janë krijime të establishmentit politik.
I pyetur në lidhje me arsyet se përse Lëvizja Bashkë nuk ka bërë një koalicion, ai renditi arsyet e tij, ndërsa ka thumbuar koalicionin “Nisma Shqipëria Bëhet” të Adriatik Lapajt, duke vënë në dukje përfshirjen e ish-deputetit Dashnor Sula dhe të babait të Lapajt në listat e kandidatëve për deputetë.
“Ne kemi parë që partitë e tjera janë tërësisht të ndryshme me ne, ose janë parti të korruptuara që kanë qeverisur, ose janë produkte të këtyre të fundit, ose janë të drejtuara nga politikanë jo parimorë që fusin ish-deputetë të partive që kanë sharë deri dje, të fusin prindërit në listat e deputetëve, etj. Niveli i seriozitetit është aq i ulët sa na ka distancuar gjithçka nga ta”, u shpreh Qori.
Listat
Kreu i Lëvizjes Bashkë, Arlind Qori, ka deklaruar se partia e tij është e organizuar dhe serioze, duke dorëzuar listat e kandidatëve në KQZ gjashtë ditë përpara afatit. Ai theksoi se vendimet janë marrë në bashkëpunim me bazën dhe nuk janë produkt i improvizimeve të minutës së fundit.
“Ne nuk fusim këdo në listat tona dhe nuk kemi pse të presim deri në fund për të plotësuar vendet bosh,” tha Qori.
Ai gjithashtu theksoi se Lëvizja Bashkë nuk është një parti e ndërtuar rreth një individi dhe për këtë arsye ai ka zgjedhur të mos jetë i pari në listën e mbyllur të partisë.
“Unë jam thjesht fytyra më e njohur, por Lëvizja është shumë më tepër se unë,” shtoi ai, duke theksuar se strukturat e partisë vendosin kolektivisht për drejtimin e saj.
Lëvizja Bashkë do të garojë në zgjedhjet parlamentare të 11 majit me një platformë që, sipas Qorit, synon ndryshimin përtej politikës tradicionale të bazuar në figura të vetme.
“Ne kemi dorëzuar listat tona për kandidatët në KQZ 6 ditë para afatit. Kjo është shprehje e seriozitetit tonë, nuk fusim këdo në listat tona dhe nuk kemi pse presim se mos mbetet dikush pa parti që ta marrim 30 minuta para mbylljes së afatit në listën tonë. Ne i kemi marrë vendimet me bazat tona dhe kemi shpallur kandidaturat, ndaj nuk kemi pasur pse të presim apo të na presë dikush.
Një nga arsyet pse nuk jam i pari në listë ka qenë sepse padrejtësisht Lëvizja Bashkë identifikohet më shumë me mua se me të tjerët. Lëvizja Bashkë është shumë më shumë se unë. Unë thjesht jam fytyra më e njohur e saj. Për të dhënë një shembull se nuk është partia në funksion të kryetarit, por është e anasjellta. Pozicionin tim e kanë vendosur forumet e partisë, por nuk mund të me imponohej që të isha i pari”, u shpreh Qori.
Discussion about this post