Nën masa të rrepta sigurie ka mbërritur mbrëmjen e sotme në aeroportin e Rinasit, ish-kreu i bandës së Durrësit, Lulzim Berisha.
Ai u ekstradua nga autoritetet spanjolle, me kërkesë të Prokurorisë së Posaçme.
Pavarësisht se Lulzim Berisha kundërshtoi ekstradimin e tij, me pretendimin se në Shqipëri i rrezikohej jeta, Gjykata Kombëtare e Spanjës vendosi që të pranojë kërkesën e autoriteteve tona për sjelljen e tij e për tu përballur me drejtësinë shqiptare.
Lulzim Berisha u arrestua në Spanjë më 14 dhjetor të vitit 2023. Ai jetonte në qytetin e Alicante nën një identitet të rremë, teksa në Shqipëri rezultonte i shpallur në kërkim ndërkombëtar.
Përballja me drejtësinë në Shqipëri
Pas arrestimit të bujshëm të 6 prillit 2006, Prokuroria e Krimeve të Rënda ngriti 10 akuza për Lulzim Berishën, mes të cilave krijimin e një organizate kriminale dhe një seri vrasjesh e atentatesh të kryera mes viteve 1998-1999.
Më 16 janar 2012, Lulzim Berisha u dënua me burgim të përjetshëm nga Gjykata e Shkallës së Parë të Krimeve të Rënda për pesë vrasje dhe disa atentate, vendim i cili u la në fuqi edhe nga Apeli.
Megjithatë, një vendim i Gjykatës së Lartë i vitit 2014 rrëzoi dënimin maksimal dhe vendosi 25 vjet burg për ish-kreun e bandës së Durrësit.
Pasi i shpëtoi burgimit të përjetshëm, Lulzim Berisha i drejtoi Gjykatës së Durrësit një lumë kërkesash për ulje dënimi gjatë viteve 2015-2016 dhe fitoi lirinë me kusht nga Gjykata e Apelit të Durrësit, edhe falë mbështetjes së ish-kreut të bashkisë së Durrësit, Vangjush Dako, i cili i dha gjykatës garanci se Berisha do të punësohej në Bashkinë e Durrësit, nëse ai nuk gjente punë në sektorin privat.
Ky vendim u hodh poshtë nga Gjykata e Lartë në dhjetor të vitit 2021, duke e rikthyer Berishën në listën e personave të kërkuar.
Në dhjetor 2020, SPAK e akuzoi Berishën dhe kunatin e tij edhe për vrasjen e Vajdin Lamajt, por gati tre vjet më vonë, prokurorët kërkuan pushimin e akuzave në gjykatë për mungesë provash (Fakt që u përdor nga Lulzim Berisha edhe në seancën gjyqësore në Spanjë). Kërkesa u pranua nga gjykata në Tetor 2024.
Në një njoftim për mediat këtë të martë, Policia e Shtetit deklaron se në vitin 2020, Lulzim Berishës i është caktuar nga GJKKO masa e sigurisë “Arrest në burg”, për veprat penale “Vrasja me paramendim”, “Vrasja në rrethana cilësuese” dhe “Mbajtja pa leje dhe prodhimi i armëve, armëve shpërthyese dhe i municionit”, të kryera në formën e grupit të strukturuar kriminal. Krime që sipas bluve kanë ndodhur në vitet 2004-2005, mes tyre edhe vrasja e Klodian Saliut.
Discussion about this post