Elton Qyno në Kushtetuese/ I kërkon SPAK kthimin e sendeve dhe asgjesimin e materialeve në telefon

Gjykata Kushtetuese po mban këtë të mërkurë, 19 Mars, një seancë publike për çështjen e sekuestrimit të pajisjeve elektronike të gazetarit Elton Qyno nga SPAK.

SPAK ka kërkuar shtyrjen e seancës ndërsa gjykata është tërhequr për vendimin e ndërmjetëm pasi Qyno ka ndryshuar objektin e kërkesës. Avokatët kanë kërkuar që Prokuroria e Posaçme, përveç kthimit të sendeve të gazetarit, të asgjesojë gjithashtu edhe materialet e aksesuara në telefonin e tij.

Elton Qyno u la në detyrim paraqitjeje pasi akuzohet për korrupsion pasiv në sektorin privat në dosjen që prokuroria po heton ndaj grupit të Suel Çelës, të shumëkërkuarit të drejtësisë, që me paratë e trafikut të kokainës, kishte shtrirë ndikimin në drejtësi dhe media. Më 14 Mars, Apeli i GJKKO e hoqi masën ndaj tij.

Sipas Prokurorisë, Suel Çela ka synuar të manipulojë perceptimin publik për të inkriminuar rivalët e grupit Çopja, duke i paraqitur ata si të paprekshëm, me lidhje të mundshme me politikën. Për realizimin e këtij skenari, SPAK thotë se janë përdorur 2 gazetarët, Elton Qyno dhe Artan Hoxha.