Apeli i GJKKO-së i heq dënimin me burg ish-kryebashkiakes së Libohovës

BoldNews.al

Fillimi AKTUALITET

Apeli i GJKKO-së i heq dënimin me burg ish-kryebashkiakes së Libohovës

13:13 : 19/03/2025

Gjykata e Posaçme e Apelit ka dhënë vendimin për ish kryetaren e Bashkisë së Libohovës, Luiza Mandi, e cila ishte dënuar nga shkalla e parë e GJKKO-së me 1 vit burgim, ku nga gjykimi i shkurtuar dënimi i ulej në 8 muaj burgim.

Burime për mediat bëjnë me dije se Apeli e ka lënë të pandryshuar dënimin e saj me 1 vit burgim dhe shpalljen fajtore për “shpërdorim detyre”, por ka marrë vendimin shtesë ku dënimin me 8 muaj burgim nga gjykimi i shkurtuar, ia ka konvertuar në shërbim prove për një periudhë kohore prej 1 viti e 4 muajsh.

Ndaj ish-kryebashkiakes së Libohovës, SPAK nisi hetimet bazuar në një kallëzim të depozituar nga një qyetar, që pretendoi se pronat e tij ishin dëmtuar gjatë zbatimit të një projekti të njësisë vendore për zgjerimin e një rruge. Megjithëse qytetarit i ishte premtuar se dëmtimi do të riparohej dhe prona do të kthehej në gjendjen fillestare, kjo gjë nuk kishte ndodhur dhe pas kërkesave të tij në bashki.

Nga hetimi i Prokurorisë së Posaçme u konstatua se pretendimet e denoncuesit për dëm ekonomik të shkaktuar ndaj tij qëndronin, paligjshmëri për të cilën u gjet përgjegjëse ish-kryetarja e Bashkisë Libohovë, Luiza Mandi.

Në një reagim të mëhershëm, pas vendimit nga Shkalla e Parë, Luiza Mandi sqaronte çeshtjen për të cilën u dënua dhe pretendonte se kërkonin t’i njollosnin emrin.

“Bëhet fjalë për një padi të ngritur kundër meje nga një pronar toke në qytetin e Libohovës. Nëpërmjet këtij postimi nuk dua të kundërshtoj apo të komentoj vendimin e kësaj gjykate, por si e votuara juaj për dy mandate, kam detyrimin që të ndaj me ju, si para Zotit, të vërtetën e këtij sulmi nga njerëz që duan të njollosin emrin tim. Para jush unë do të jap llogari, njësoj sikur të isha në detyrë.

Gjatë zbatimit të projektit për restaurimin e qendrës së qytetit Libohovë, në vitin 2016, lindi nevoja për zgjerimin e rrugës dytësore, bypass-it të qytetit. Zgjerimi do të “cënonte” edhe pronën në bashkëpronesi nga 10 pronarë, ku vetëm 15.8 metra katror i takonin paditësit. Duke qenë një sipërfaqe kaq e vogël, asnjëri nga bashkëpronarët, perfshi edhe paditësin, nuk kërkuan asnjë dëmshpërblim për këtë, por vetëm disa punime sistemimi në bahçen e shtëpisë së tyre, të cilat ju plotësuan. Punimet për sistemimin e rrugës zgjatën disa muaj, por në asnjë rast, bashkëpronarët apo paditësi, nuk kanë patur asnjë ankesë për zaptim prone, në Bashkinë Libohovë apo në ndonjë instutucion tjetër lokal. Vlera totale e pronës, sipas vlerësimit, qenkërka 3 milionë e 600 mijë lekë (të vjetra) dhe vlera që paditësit “i takon” është 360 mijë lekë (të vjetra).” – shkruante ish-kryebashkiakja pas vendimit të GJKKO-së më 13 Qershor të vitit të kaluar.