Në ditën e fundit të ultimatumit të vendosur nga ish-kryeministri Sali Berisha, ka ardhur dhe reagimi i parë i kreut të PD, Lulzim Basha.
Nëpërmjet një postimi në Facebook, Basha ka përkujtuar 31 vjetorin e krijimit të gazetës Rilindja Demokratike, teksa e cilëson këtë të fundit si themeluese të shtypit të lirë shqiptar. Basha e konsideron RD, si një tribunë refleksionesh mbi regjimin komunist të së shkuarës dhe mbi demokracinë e shumëpritur të së ardhmes.
“Mëngjesin e 5 janarit 1991, pas një pritje gjysmë shekullore, “Fjala e parë” mbërriti në duart e shqiptarëve. Rilindja Demokratike, e para media opozitare në Shqipëri, u bë themeluesja e shtypit të lirë shqiptar, duke shënuar përgjithmonë historinë e re të vendit. Një tribunë refleksionesh mbi regjimin komunist e të shkuarës dhe mbi demokracinë e shumëpritur të së ardhmes, vepër e intelektualëve, gazetarëve, studentëve, që i’u bashkuan prej orës së parë Partisë Demokratike, për të sjellë fjalën e lirë, votën e lirë dhe ribashkimin me Perëndimin. Në këtë përvjetor të 31-të, dua të shpreh mirënjohjen time dhe të Partisë Demokratike për të gjithë drejtuesit, kryeredaktorët dhe gazetarët e Rilindjes Demokratike, të cilët kanë kontribuar për lindjen dhe zhvillimin e bijës së lirisë, si mbrojtëse e interesit publik, promovuese e vlerave universale të njeriut dhe vokacionit tonë perëndimor, në ditë të mira dhe të vështira”, shkruan Basha.
Mes rreshtash, kryedemokrati shkruan se sot akoma liria e media në ditë të vështira, ndërsa garanton mbështetje ndaj medias.
Discussion about this post