Kristjan Asllani, mesfushori i Interit, ka folur pas humbjes së Shqipërisë ndaj Anglisë me rezultatin 2-0. Në një intervistë për “SportMediaset”, ai ka shprehur dëshirën e tij për të qëndruar në Milano për shumë vite, duke theksuar:
“Të qëndroj tek Interi për shumë vite? Po, sigurisht. E kam thënë gjithmonë se jam tifoz i Interit, por nuk dua të bëj premtime, sepse tani është e kotë. Mendoj ta përfundoj sa më mirë sezonin”.
Asllani ka folur gjithashtu për kritikat dhe fishkëllimat që ka marrë nga tifozët e Interit, duke pranuar se ndonjëherë ato ishin të merituara: “Kam marrë kritika, nuk jam këtu për të thënë gënjeshtra. Sigurisht, nëse më kanë fishkëllyer, kanë pasur arsye, nuk kam luajtur mirë dhe i meritoja ato. Sidoqoftë ka edhe diçka: pas Superkupës ata ishin shumë agresivë me mua, nuk mendova se e meritoja atë trajtim”.
Pavarësisht kritikave, Asllani ka siguruar se kjo nuk do të ndikojë në mënyrën se si do të vazhdojë të punojë dhe përmirësohet: “Unë vazhdoj të punoj qetësisht, ekipi më mbështet, kam një familje që më do. Do të vazhdoj përpara, jam 23 vjeç, e di që mund të rritem. E di gjithashtu që në këto tri vite ndoshta nuk kam treguar shumë, por shpesh nuk kam pasur mundësi t’i tregoj aftësitë e mia.
Kam pranuar që ta bëj këtë dhe jam i lumtur, por mos harroni se kam para në rolin tim lojtarë të fortë si Hakan, që është një mësues dhe vëlla për mua, është e drejtë të mësoj prej tij. Po ashtu, ishte e drejtë të mësoja nga Brozovic, që ishte një nga mesfushorët më të fortë në botë”.
Ai gjithashtu ka shprehur optimizëm për të ardhmen dhe besimin se është gati për të dhënë më shumë për ekipin zikaltër: “Mendoj se jam gati, kam bërë një rrugëtim të mirë rritjeje. Kur mbërrita tek Interi, e bëra sepse e shikoja veten për shumë vite aty.
Shpresoj të qëndroj shumë vite me fanellën zikaltër, edhe pse në futboll nuk dihet asgjë. Do të shohim se çfarë do të ndodhë, tani kemi këto dy muaj dhe do të mundohemi të japim maksimumin”.
Discussion about this post