Qeveria italiane nuk heq dorë nga vënia në funksion e qendrës së emigrantëve në Gjadër. Pas refuzimit nga gjykatat italiane të dërgimit në Shqipëri të emigrantëve që shpëtohen në ujërat e Mesdheut nga marina ushtarake e këtij vendi, qeveria në Romë po shqyrton mundësinë e shndërrimit të tyre në kampe riatdhesimi për azilkërkuesit e refuzuar.
Kryeministrja Giorgia Meloni pritet ta dekretojë këtë plan në mbledhjen e qeverisë të parashikuar për të Premten. Planin e bëri të ditur në një invervistë për shtypin italian, ministri i Brendshëm Matteo Piantedosi, i cili shprehet se në kompleksin Shëngjin-Gjadër do të dërgohen azilkërkuesit, të cilëve u është refuzuar e drejta për të qëndruar në Itali, pasi nuk përmbushin kriteret.
Në këto kampe, ata do të qëndrojnë deri në përfundim të procedurave të kthimit në vendet e tyre të origjinës. Ndryshimi i funksionit të qendrës së emigrantëve në Gjadër është në përputhje edhe me planin e Komisionit Europian, që lejon vendet anëtare të arrijnë marrëveshje për ngritjen e qendrave të riatdhesimit të emingratëve të jashtëligjshëm me vendet që nuk janë pjesë e Unionit.
Kampi i Gjadrit do të ketë këtë funksion, të paktën deri kur Gjykata Europiane e të Drejtave të Njeriut të përcaktojë se cilat konsiderohen vende të sigurta origjine, një listë që do të ketë fuqi për gjithë Bashkimin Europian.
Discussion about this post