Turqi, rreth 1 900 të arrestuar në protestat kundër arrestimit të Imamoglu

Turqia hodhi poshtë sot deklaratat ndërkombëtare “të paragjykuara” lidhur me arrestimin e kryebashkiakut të Stambollit, Ekrem Imamoglu dhe protestat mbarëkombëtare të shkaktuara prej tij, pasi autoritetet arrestuan rreth 1 900 njerëz që merrnin pjesë në demonstrata, sipas “Reuters”.

Imamoglu, rivali më i madh politik i presidentit Tayyip Erdogan – u burgos të dielën pas akuzave për korrupsion.

Arrestimi i tij shkaktoi protestat më të mëdha antiqeveritare në një dekadë dhe çoi në arrestime masive në të gjithë vendin.

Partia Republikane Popullore (CHP) kryesore e opozitës së Imamoglu, partitë e tjera opozitare, grupet e të drejtave dhe fuqitë perëndimore thanë se çështja kundër kryebashkiakut – ishte një përpjekje e politizuar për të eliminuar një kërcënim të mundshëm elektoral ndaj Erdogan.

Qeveria ka mohuar çdo ndikim mbi gjyqësorin duke theksuar se gjykatat janë të pavarura.

Duke folur me përfaqësuesit e medieve ndërkombëtare në Stamboll, ministri i Drejtësisë Yilmaz Tunc tha se Ankaraja u kishte kërkuar partnerëve të saj evropianë të vepronin me “mendje të shëndoshë”, duke shtuar se ashpërsia e akuzave kundër Imamoglu kërkonte arrestimin e tij.

“Ne nuk duam arrestimin e asnjë politikani, por nëse ka prova për shkelje, atëherë kjo mund të ndodhë”, tha Tunc.

Partia Republikane Popullore (CHP) u ka bërë thirrje qytetarëve të vazhdojnë protestat, duke thënë se do të organizonin mitingje dhe tubime në vende të ndryshme në Stamboll dhe qytete të tjera.

Erdogani ka hedhur poshtë protestat duke i quajtur një “show” dhe ka paralajmëruar për pasoja ligjore ndaj protestuesve.

Ministri i Brendshëm, Ali Yerlikaya tha se 1 879 persona ishin arrestuar që nga shpërthimi i protestave të mërkurën e kaluar, duke shtuar se gjykatat burgosën 260 prej tyre – në pritje të gjykimit.

Ai shtoi se 489 persona ishin liruar dhe 662 të tjerë ishin ende në procedim, ndërsa 150 policë ishin plagosur.

Grupet e të drejtave i kanë bërë thirrje Turqisë të hetojë atë që ata e quajtën përdorimin e tepruar të forcës nga policia gjatë shpërndarjes së turmave dhe i kërkuan qeverisë të lejonte demonstratat, të cilat kanë qenë kryesisht paqësore.