Këshilli i Lartë Gjyqësor (KLGJ) ka pranuar pjesërisht kërkesën e Inspektorit të Lartë të Drejtësisë (ILD) për procedimin disiplinor ndaj gjyqtares së Shkodrës, Arta Llazari.
Teksa ILD kërkonte shkarkimin nga detyra të magjistrates për “Shkelje shumë të rëndë disiplinore“, KLGJ ka vendosur vetëm që ta pezullojë nga detyra për 6 muaj.
ILD nisi hetimin ndaj gjyqtares Llazari pas 11 ankesave për mosrespektim të afateve procedurale dhe neglizhencë në detyrë. Nga hetimet rezultuan vonesa të pajustifikueshme në shqyrtimin e çështjeve, ku në disa raste mungonin veprime për më shumë se tre vite.
Sipas raportit të ILD-së, rreth 64% e çështjeve civile të themelit për vitin 2021 dhe 90% për vitet 2022 dhe 2023 janë në tejkalim të afatit ligjor të arsyetimit/dorëzimit (vendime të llojit kryesisht vërtetim fakti juridik për njohje vërtetësie e zgjidhje martese, njohje pronësie apo pjestim pasurie). Gjithashtu, vonesa të konsiderueshme janë konstatuar edhe në urdhërat e mbrojtjes, ekzekutimet dhe masat e sigurimit.
Sipas ILD-së, veprimet e magjistrates janë kryer të paktën me pakujdesi në formë neglizhencës, e përsëritur dhe e vazhdueshme, e në disa raste kanë shkaktuar dëm në procedurat hetimore.
Po ashtu, në raport thuhej se gjyqtarja ka dëmtuar dukshëm imazhin e drejtësisë dhe besimin e publikut në të, edhe pse ka 24 vite eksperiencë, tregues i njohjes shumë të mirë të ushtrimit të detyrës me disiplinë.
Gjyqtarja Arta Llazari u konfirmua në detyrë nga shkalla e parë e vettingut (KPK) më 13 shkurt 2023, ndërsa dy çështje të gjykuara prej saj u dërguan për verifikime të mëtejshme pranë Inspektorit të Lartë të Drejtësisë.
Arta Llazari ka përfunduar studimet në Shkollën e Magjistraturës në vitin 2001 dhe e ushtron funksionin prej më shumë se dy dekadash në Gjykatën e Shkodrës. Ajo ka punuar edhe si këshilltare ligjore pranë Gjykatës Kushtetuese.
Discussion about this post