Kanë përfunduar dy ndeshjet e mbrëmjes së sotme, të vlefshme për çerekfinalet e UEFA Champions League. Në këto dy sfida u shënuan plot 8 gola.
Barcelona ka fituar 4-0 ndaj Dortmundin në ndeshjen e parë në çerekfinalet e Champions League. Një dominim total i katalanasve nga fillimi në fund të ndeshjes.
Vendasit zhbllokuan rezultatin falë Pau Cubarsi-t, në minutën e 25-të, edhe pse goli iu quajt Raphinha-s, pasi ishte braziliani që e preku para se të shkontë në rrjetë.
Pas ekzekutimit të goditjes së dënimit, dhe pas një pasimi me kokë nga Ingo Martinez brenda zonës, Cubarsi godet bukur dhe topi shkon në rrjetë, por Raphinha në kufijtë e pozicionit jashtë loje i dha prekjen e nevojshme që goli të quhej i tij. Festa e katalanasve ndalet për një moment nga VAR, më pas goli konfirmohet i rregullt.
Barcelona e nisi direkt me gol pjesën e dytë. Katalanasit kanë dyfishuar shifrat pas një aksioni të shpejtë, ku Lamine Yamal kroson bukur në zonë, Raphinha asiston me kokë për Lewandowski-n, polaku dërgon topin në rrjetë.
Në minutën e 66-të, një kundërsulm i shpejtë i katalanasve, Fermin Lopez depërton bukur në krah dhe asiston për Lewandowskin, polaku shënon golin e tretë për Barcelonën dhe të dytin personal për këtë takim. Ky ishte goli i 105-të në Champions League për sulmuesin polak.
Në minutën e 76-të ishte radha e Lamine Yamal për të shënuar pas asistit të Raphinha-s. Rezultati përfundimtar, Barcelona-Dortmund 4-0.
Me këtë rezultat katalanasit thuajse kanë siguruar biletën për në gjysmëfinale dhe ndeshja e kthimit duket se do jetë thjesht formalitet.
Në sfidën tjetër PSG ka shënuar fitore ndaj Aston Villas me rezultat 3-1 në kuadër ndeshjes së parë çerekfinale të Ligës së Kampionëve.
PSG e nisi shumë mirë ndeshjen, duke krijuar dy raste të mira me Osumane Dembelen, por që francezi nuk shënoi.
Në anën tjetër, Aston Villa në rastin e parë serioz gjeti rrjetën, me Jouri Tielemans që gjeti Morgan Rogers, i cili shënoi për 1-0 në minutën e 35-të.
Por nuk vonoi shumë dhe Desire Doue në tentativën e dytë e dërgoi topin në rrjetë për 1-1, me një goditje të bukur jashtë zonës.
Me të filluar pjesa e dytë, PSG mori epërsinë me Khvicha Kvaratskhelian që shënoi me një goditje të bukur për 2-1.
PSG nuk u ndal dhe ishte shumë afër golit të tjerë me Kvaratskhelian dhe Achraf Hakimin, por që topi nuk e gjeti rrjetën.
Aston Villa kërkoi penallti me Boubacar Kamara, i cili u rrëzua në zonë, por që gjyqtari nuk mendoi të drejtojë gishtin në pikën e bardhë.
Hakimi gjeti rrjetën në minutën e 71-të, por që ishte në pozitë jashtë lojës.
Ishte Nuno Mendes i cili me disa lëvizje të bukura, rrëzoi pastaj dhe portierin Emiliano për të shënuar për 3-1.
Ndeshja kthyese zhvillohet pas një jave, me të dy skuadrat që kanë gjasa për të kaluar me tutje.
Discussion about this post