27-vjeçari i humbur në Has/ Rinisin kërkimet në bjeshkët e Hasit

Kërkimet për gjetjen e 27-vjeçarit Ajet Leshi, i cili ka humbur kontaktet që prej 6 prillit, kanë rinisur në orët e para të mëngjesit të kësaj të enjteje në bjeshkët e Domajve të Hasit.

Kërkimet po kryhen nga banorët e zonës, gjahtarë, policë, ushtria dhe emergjencat civile të Hasit.

Prefekti i Qarkut Kukës, Dritan Baji, njoftoi se nëse kërkimet nuk do të japin rezultate gjatë ditës së sotme, të premten do të dërgohen 100 trupa ushtarake për të ndihmuar

Ajet Leshi, i cili jeton në fshatin Kishaj të Hasit, u largua më 6 prill për të shkuar në gjah në bjeshkët pranë Malit të Pashtrikut.

Pas një telefonate për ndihmë që bëri në mesditën e 6 prillit, ai humbi çdo gjurmë, dhe kërkimet vazhdojnë pa rezultate, pavarësisht operacioneve me helikopter dhe dron nga ushtria dhe Shërbimi Kombëtar i Kërkimit Shpëtimit Malor i Kosovës, që dy ditë më parë njoftuan ndërprerjen e operacionit deri në grumbullimin e informacioneve të nevojshme.