Besimtarët ortodoksë festojnë sot të ashtuquajturën të dielën e ‘Dafinave’.
E diela e Dafinave është dita kur Jezu Krishti para se të kryqëzohej hyri si fitimtar në Jerusalem.
Kryepeshkopi i Tiranës, Durrësit dhe gjithë Shqipërisë, Fortlumturia e Tij, Joani ka mbajtur predikimin e tij në Kishën Orthodhokse “Ngjallja e Krishtit” në Tiranë.
“40 ditët e Kreshmës së Madhe teknikisht kanë përfunduar të premten në darkë. Siç thotë edhe Tropari pasi përmbushëm 40 ditët, Kisha bën një ndalesë. Kemi dy festa shumë të mëdha, festival të mëdha të krishterimit, për të filluar javën e madhe ku Kreshma bëhet akoma më e fortë dhe ku përjetimi i gjithë veprës shpëtimtare të Zotit nëpërmjet pësimit, kryqëzimit dhe ngjalljes së tij bëhet më intensive.
Në këto dy ditë, Kisha na kujton ne për diçka shumë të rëndësishme. Të shtunën e Llazarit na kujtoi për ngjalljen, e ngjallja e Llazarit ishte një profeci në veprim. Duke ngjallur Llazarin, Zoti tregoi jo vetëm thjesht ngjalljen e tij, por ngjalljen e të gjithëve.
Një ditë të gjithë ne do të përballemi me këtë gjë. Kisha na thërret ne që të marrim seriozisht këtë gjë. Sepse në Kishë ndodh diçka që siç thotë dhe thënia e famshme në kishën Orthodhokse, ‘Perëndia qëndron përmbi arsyen, por jo jashtë arsyes’. Ka shpjegim, por e kapërcen shpjegimin tonë njerëzor.
Në festat e mëdha përsëritet diçka, sot ngjallet Llazari, sot vjen Krishti, sot lindi Krishti. Çfarë duhet thënë kur kisha thotë sot? Thotë thelbin e shërbesës dhe mistereve të Kishës Orthodhokse, sepse çdo gjë që prek Zoti nuk ndalet vetëm thjesht me historinë. Çdo gjë që ka prekur Perëndia e bën të tanishme”, tha gjatë predikimit, Fortlumturia e Tij, Joani.
Discussion about this post