Pesë persona të shpallur në kërkim kombëtar dhe ndërkombëtar janë arrestuar pasditen e sotme nga Interpoli.
Burime zyrtare nga policia bëjnë me dije se ëhtë bërë ekstradimi nga Hungaria drejt vendit tonë, i shtetasit në kërkim ndërkombëtar Bilal Lluka 36 vjeç. Lluka do të përballet me akuzën për veprat penale “Kanosja” dhe “Armëmbajtja pa leje”.
Po nga Zyra Qendrore Kombëtare Interpol Tirana u bë ekstradimi nga Italia drejt vendit tonë, Eduardo De Francesko 56 vjeç, i cili ishte në kërkim ndërkombëtar për veprën penale “Trafikimi i mjeteve motorike”.
Personi i ekstraduar në PKK Rinas, iu dorëzua Drejtorisë së Përgjithshme të Burgjeve.
Në vijim të punës për kapjen e personave të shpallur në kërkim dhe vënien e tyre para përgjegjësisë ligjore, nga specialistët për Hetimin e Narkotikëve në DVP Gjirokastër u bë kapja dhe ndalimi Gani Abazi, 61 vjeç, banues në Tepelenë, i shpallur në kërkim kombëtar për veprën penale “Kultivimi i bimëve narkotike, kryer në formën e grupit të strukturuar kriminal”. Gjykata e Apelit për Krimet e Rënda Tiranë e ka dënuar këtë shtetas me 8 vite burgim.
Po ashtu sot policia ka arrestuar në lagjen “18 Shtatori”, Gjirokastër, Viktor Gaco 38 vjeç i akuzuar për veprën penale “Vjedhja” e kryer në bashkëpunim, në bazë të urdhrit të ndalimit të lëshuar nga Prokuroria pranë Gjykatës së Shkallës së Parë Tiranë.
Sipas njoftimit zyrtar nga policia, është arrestuar edhe A. K., 30 vjeç, pasi ishte i shpallur në kërkim në kuadër të operacionit policor të koduar “Autostrada”, për veprën penale “Vjedhja” kryer në bashkëpunim. 30- vjeçari dyshohet se është pjesë e një grupi të strukturuar kriminal që kryente vjedhje të kasafortave në biznese dhe vila në autostradën Tiranë-Durrës. Në kuadër të operacionit të zhvilluar më 12 dhjetor u arrestuan në flagrancë 3 shtetas dhe u shpallën në kërkim 3 të tjerë.
Discussion about this post