Suedia është tronditur nga të shtëna me armë zjarri që janë regjistruar në qendër të Uppsalës, një qytet universitar, rreth 70 km në veri të Stokholmit.
Alarmi u dha pak pas orës 5 pasdite pas disa raportimeve dhe një operacion i madh policor është duke u zhvilluar aktualisht në vendngjarje. Dëshmitarët që folën për Sveriges Radio, thanë se dëgjuan të shtëna me armë zjarri, të paktën gjashtë herë. Ngjarja ka ndodhur pranë një berberhaneje në një shesh qendror, jo shumë larg stacionit të trenit.
Mediat lokale raportuan se disa ambulanca ishin në vendngjarje dhe policia konfirmoi se ka persona të plagosur, megjithëse detajet për gjendjen e tyre nuk dihen ende.
Burime të tjera, në mediat sociale dhe disa stacione radiofonike lokale, flasin për disa të vrarë, të paktën tre.
I gjithë transporti publik në zonë është bllokuar përkohësisht. Sipas informacionit të dhënë gazetës Aftonbladet, policia po ndjek autorin e dyshuar, i cili u largua nga vendi i ngjarjes me një skuter elektrik, në Uppsala-n qendrore.
Një helikopter policie është ngritur gjithashtu në zonë. Ngjarja vjen rreth tre muaj pas një sulmi me armë të ndodhur në muajin shkurt, ku një person hyri në kampusin Risbergska në Örebro, pranë Stokholmit, duke vrarë 10 persona përpara se të kryente vetëvrasje.
Discussion about this post